Shillong, Nailur 26 : Ka Khasi Hills Autonomous District Council (KHADC) ha ka sngi Palei ka la kyntu ïa u Lat ka Jylla ban ai noh ka jingmynjur ïa ki 7 tylli ki aiñ rew kiba ka Council ka la dep ban wanrah bad mynjur naduh u snem ba la dep.
Haba kren bad ki lad pathai khubor hadien ka jingïakynduh ïa u Lat, u CEM ka Council, Bah Pynïaid Sing Syiem u la ïathuh ba na kine ki 7 tylli, ar tylli ki dei ki Bill kiba donkam bha kiba kynthup ïa ka KHAD (Administration of Elaka) Amendment Bill, 2023 kaba dei na ka bynta ban pynkup bor shuh shuh ïa ki seng samla badki seng longkmie ba kin lah ban treikam khambha shuh shuh ha ki shnong ki thaw da ka jingthuh jong ka aiñ.
Shuh shuh u la ïathuh ba kawei pat kadei ka KHAD (Khasi Social Custom of Lineage) Amendment Bill 2023, kaba ka thong jong ka, ka long ban rejistar bad pynbeit pynryntih ïa ki Kur ki Jait.
“Katkum ka jingwad jingtip, ki la don palat 3,000 tylli ki Kur Khasi ha u pud u sam ha rilum Khasi hynrei haduh mynta kim pat ïoh satia ïa ka jingithuh da ka aiñ. Katkum ka aiñ rew dei ban don tang uwei u rangbah kur uban ïoh ïa ka jingithuh daka KHADC,” ong u CEM da kaba pyntip ruh ba na ka lïang u Lat u la ai ka jingkular ban ai kham kloi ka jingmynjur ïa kine ki ar tylli ki Bill.
Ha kajuh ka por u la ïathuh ruh ba ki la kyrpad ruh ïa u Lat ban ai ka jingmynjur ïa kiwei pat ki Bill kiba kynthup ïa ka KHAD (Regulation and Administration of Land) Rules, 2023 kaba la wanrah bad mynjur da ka Dorbar KHADC ha u 2021. Halor kane u CEM u la ong ba ki donkam ïa ki kyndon (Rules) na ka bynta ban pyntreikam pura ïa ka Land Act kaban rejistar bad ïada ïa ka khyndew ka shyiap jong ki riewlum.
Kiwei pat ki Bill ki kynthup ïa ka KHAD (Regulation and Administration of Land) Amendment Bill, 2024, KHAD (Fisheries Amendment) Bill, 2023, Regulation of Trading by Non-Tribal Amendment Rules, 2023 bad ka KHAD (Autonomous Districts Nomination and Election of Lyngdoh and Myntri, Lyngdoh Raid and Sordar Shnong Administration of Sohiong Lyngdohship) 2023.
