Mawkyrwat, K’Lyngkot 18 : Hadien ka jingwad kaba la kynjoh haduh 4 (Saw) sngi ei ei naduh ba u Khlaiñkupar Nongsiej u la jah na la ïing ha kaba halor kane ka jingjia na ka liang kiba ha ïing ha sem, ka shnong ka thaw ki la pynlong ka jingwad ïa u la bun bun sngi hynrei kim shym la lap dien.
Kumta, dei tat ha ka 18 tarik u Kyllalyngkot, 2026 ki Pulit ka Mawkyrwat ki la pyntip ha kiba ha ïing ha sem ba ïa ka met jong u lap hajan kawei ka wah kaba don ha shnong Rangmaw. Kumta na ka liang kiba ha ïing ha sem kim don jingtharai sniew ei ei halor ka jingïap jong u.
Lah ban kdew ba u Khlaiñkupar Nongsiej, 22 snem ka rta na ka shnong Rangmaw kaba hap hapoh jong ka Maharam Syiemship, South West Khasi Hills District, Meghalaya bad u la jah na la ïing ha ka 13 tarik u Kyllalyngkot, 2026 ha ka por kumba 11:30 baje mynstep bad um shym la wan phai shuh sha la ïing. La ong ruh ba kiba ha ïing ha sem bad ki nongshong shnong kiba sngewkhia bad ki la pynlong ïa ka jingwad hapoh bad ki jaka kylleng sawdong jong ka Shnong Rangmaw, kynthup ïa ki jaka ba marjan bad ka Wah Umngot/Umngi, hynrei ym shym la lap satia ïa ka jingtip shaphang jong u.
La ong ruh ba la aiti ïa ka kaiphod jong ka jingjah jong une u samla sha u Officer-in-Charge, Mawkyrwat Police Station, da kaba kyrpad ïa ka jingtohkit bad ban phah ïa ka kynhun ban ïarap pynwad lem. Wat hapdeng ki jingpyrshang ban ïai bteng ban, hynrei ha ka sien ba nyngkong ym shym la lah satia ban lap dien ïa u Khlaiñkupar Nongsiej.
Hynrei dei tat ha ka 18 tarik u Kyllalyngkot, 2026 la lap ïa ka metïap jong u hajan ka wah ba don marjan bad ka shnong bad hadien kata la wanrah sha Mawkyrwat Police Station bad ki pulit ki la pyntip sha kiba ha ïing halor ka jinglap ïa ka met jong u Khlaiñkupar Nongsiej.
Halor ka met jong u, kiba ha ïing ha sem bad ki bor shnong ki la aiti ïa ka jingkyrpad sha u Additional Deputy Commissioner, South West Khasi Hills District, ban pan jingpyllait na ka eksamin halor ka met jong u bad ïa ka met jong u Khlaiñkupar Nongsiej la aiti ha kiba ha ïing ha sem ba kin leh ïa kaba donkam baroh.
