Hadien 72 kynta kurup biang ka Israel ïa ki khappud Gaza, lap 1500 tylli ki metïap lehnoh Hamas

Jerusalem, Risaw 10: Hadien 72 kynta naduh ba ki Hamas ki la hiar thma kyndit ïa ka Israel, ki shipai Israel Defence Forces (IDF) mynta ka sngi, ki la ïoh kurup biang ïa ki khappud bad ka Gaza. Ki heh Shipai ka Israel ki ïathuh ruh ba lap haduh kumba 1500 ngut ki lehnoh kiba la kyllon ïap ha ki bynta jong ka Israel.
“Ngi la ïoh kurup biang ïa ki khappud bad ka Gaza bad ïa ki jaka ba rung ki lehnoh ha ka sngi Saitjaiñ ruh ngi la khang”, la ong ki heh shipai IDF.
Kane ka jingïoh kurup biang ka Israel ïa ki khappud, ka long hadien ba la ka la ther bom naduh ka sngi Saitjaiñ janmiet haduh lai sngi lynter haduh ka miet Lah sngi U Blei ha ki palat spah tylli jaka shong ki Hamas. Ka shipai IDF ki la kam ba ha kane ka jingther bom arngut ki nongïalam ba hakhmat jong ki Hamas ki la ïap.
Na Gaza pat ki khubor lyngba ka tnad ka koit ka khiah, ka ïathuh ba kumba 700 ngut ki briew ki la ïap ha ka jingther ka bom ka Israel ha kaba kiba bun ki ïing paki dulan ki la khyllem.
Ka Israel pat ka la ïathuh ba ki briew kila ïap na ka jingwan hiar thma ki Hamas ki la poi palat 1000 ngut. Ka jingkiew kiba ïap ka long ba la nang lap ïa ki briew,kynthup ïa ki khunlung, ki khynnah, ki kynthei kiba la shah siat ïap ha ki ïing ki sem, ki kper ki phrah, haba ki Hamas ki la rung mynsngi Saitjaiñ ha kylleng kylleng ki shnong.
Ki shipai Israel ki la ïalap ïa ki nongthoh khubor jong ka pyrthei sha ki shnong ki thaw ban pyni ïa ka jingpynïap pathar jong ki Hamas ïa ki riew paidbah. “Kam dei shuh ka thma, hynrei ka ladei ka jingpynïap dusmon bad ka jingpynïap naphang (Massacre)”, la ong ki bor shipai IDF.
Ha kane ka jingther bom ka Israel la ïathuh ruh ba lai ngut ki nongthoh khubor jong ka Gaza ki la ïap bad nalor kine saw ngut kiwei pat ki nongthoh khubor ki la ïap ha kine ki arsngi ba la ther bom ka Israel, ong ki nongsynshar ka Gaza.
Ki bor synshar ka Israel ki la ïathuh ba haduh mynta ki don palat spah ngut ki briew na Israel kiba la shah rahbor ha ki Hamas sha Gaza bad na kine, ki kynthup ruh ïa ki heh shipai,ki kynthei bad ki riew tymmen.