Nongstoiñ, Nailar 26: Ka Nongkyna L.P skul ka dei ka skul kaba la seng naduh u snem 1972, ha kaba ka jingïaid lynti jong ka, ka la kynjoh mynta la sanphew ar tylli snem, hynrei kam pat don ïa ka ïing skul kaba paka kaba biang.
Dei tad naduh u snem 2018 haduh 2022 ha ka por ba u bah Gikur Myrthong u la shah jied kum u MLA ka Mawshynrut Constituency, ba lyngba ka jingnoh synñiang jong u, la lah ban tei ïa ka ïing kaba paka bad kaba la biang bha na ka bynta ba ki khynnah skul naduh ki klass I haduh ki klass IV kin shong klas.
Ïa katei ka ïing skul ba thymmai la plie mynta ka lah sngi u Blei da u bah Gigur Myrthong MDC/MLA barim, u ba la long u kongsan u ba la noh synñiang bad pynbit pynbiang ban tei ïa katei ka ïing skul.
Hadien ba u la dep ban plie ïa katei ka skul, la pynlong ïa ka jingïalang ha kaba la pynïaid da u bah Enkupar Ïawphniaw Chairman jong ka Managing Committee, ha ryngkat ka jingïadon lang jong ki dkhot jong ka M/C ki Tymmen basan bad ki dkhot jong ka Balang Presbyterian Mawthengkut, kaba la ai sngewbha ïa ka jaka ba la shna ïa katei ka ïing skul.
Kiwei ki kynthup u babu C. Ïawphniaw na ka ophis u SDSEO, ka Block Mission Coordinator jong ka Mawshynrut Block, u babu Savio Dkhar CRC ki Nonghikai, ki khynah skul ryngkat ki kmie ki kpa lem bad ki sordar jong ki shnong ba marjan.
Ha ka jingïalang la pynsngew ruh ïa ka kaiphod naduh ba la sdang ban seng ïa katei ka skul da ka kong Bibimoris Marweiñ Head Teacher. Nalor kata na ka liang jong ka ophis u SDSEO la ïoh ban kren lyngkot da u babu C.Ïawphniaw bad ha kajuh ka por la ïoh ïa ka jingkren na ka Block Mission Coordinator kaba dei ka nongpeit nong khmih ïa ki skul kiba don hapoh ka Mawshynrut C&RD Block.
Haba ai jingkren na ka liang ka BMC ka la ong ba ki don shibun ki skul kiba ka rukom hikai ïa ki khynnah, ki long kynrum kynram bha bad ha ki Government L.P skul lei lei, ki don ki nonghikai ki bym shim khia satia ïa ka kam hikai jong ki.
Ka la ong ruh ba wat napdeng ki kmie ki kpa ruh ki don kiba kheiñ sting ha kaba phah skul ïa ki khun ha kaba kim pynbiang ïa ki kot pule, ki kopi namar ba ki dei ki skul sorkar. Ha kajuh ka por ka la ong ba ka jingïatreilang jong ki kmie ki kpa, ki nonghikai bad ki khynnah sklul ka long kaba don kam haduh katta katta.
U babu Savio Dkhar CRC jong ka Mawshynrut Block u la pynkynmaw ba naduh ba la seng ïa katei ka skul, la shna da ka ïa ka ïing skul da ki dieng bad tap da ki tim, hynrei suki suki ki tin sop ki la sarng bad pei thliew haduh ba ha ka por ba slap la hap ban tap najrong da ki tarpaulin. Ki rishot jong ka ïi ng ruh ki la bam kruiñ lut kaba la buh ïa ki khynnah ha ka jingma lada jia ba wan ka erïong ne u phria.
U la ong ruh ba na ka liang ki nongpynïaid jong ka skul ki la pyrshang ban wad jingïarap na ka sorkar, hynrei na ka liang ka sorkar pat ka la ong ba ïa ki ïing skul kiba la don lypa, ki kyndon kim shah ban ai jingtei thymmai lait noh tang ki additional class rom.
Hynrei, da ka jingtrei shitom bad ka jingshimkhia jong u bah Gigur Myrthong ha ka por ba u long kum u MLA, la lah ban pynïoh jingïarap da katei ka ïing skul kaba la ïaryngkat dor bad kiwei pat ki ïing skul kiba la bit la biang.
U bah Gigur Myrthong MDC u ba long u kongsan haba ai jingkren ha katei ka sngi, u la ong ba ki nonghikai ki dei ki kmie ki kpa kiba ar jong ki khynnah kiba trei shitom met bad mynsiem, ha ka ban hikai bad pynnang pynstad ïa ki khynnah kiba dei ki lawei jong ka ïing ka sem, ka shnong ka thaw bad ka jylla hi baroh kawei.
U la ong ruh ba ki khynnah ki dei ban kohnguh bad burom ïa ki nonghikai bad haba ki leit skul, kim dei ban khmih lynti tang ïa ki kam sorkar hynrei ki dei ban beh na ka bynta ka jingnang jingstad ba kham sha jrong, namar khlem ka jingnang jingstad kaba biang kin ym lah ban leh ei ei.
U la ong ruh ba ki don shibun ki khynnah na ka jylla kiba la nang la stad kiba trei ha ki Kompeni bapher bapher ha kiwei pat ki jylla kum ha Kerala, Banggalore, Mumbai, Delhi bad ha kiwei kiwei ki nongbah jong ka ri India kiba u la ïakynduh da lade. Kine baroh u ong ki mih na u soh ka jingtrei shitom.
Kumta, la kyntu ïa ki kmie ki kpa ba kin don ka jingpynïadei kaba jan bad ki nonghikai, ba kin ïatreilang ha baroh ki liang na ka bynta ban kyntiew ïa ka jingnang jingstad ïa ki khun ki kti.
