Hadien 27 snem leit jngoh u Bah Paul ïa ka phatok Silchar ba shah set kum u President KSU
Silchar, Risaw 9 : Hadien 27 snem leit jngoh biang u bah Paul Lyngdoh ïa ka phatok ha Silchar kaba ma u kum u President ka KSU ha kato ka por lem bad kiwei ki nongïalam ka KSU ki la shah set palat lai bnai ha u snem 1995 halor ka jingïakhih jongki ban pyrshah ïa ka rukom pynrung kyrteng ha ka Electoral Roll ha ka por ba pyntreikam ïa ka EPIC .Kane ka jingleit jngoh jongu ïa katei ka phatok ka long ha ka 7 tarik mynta u bnai 2022 shwa ba un hiar sha Barak Valley ban ïadon lang bad ka jingïalang ba heh tam jong ki jaidbynriew Khasi Pnar kiba im ba sah ha katei ka jaka.
Kiba la shah kem bad shah set phatok lang bad u bah Paul ha kato ka por bad shah set ha katei ka phatok ki dei u bah Samuel Jyrwa President ba rim ka KSU, Pyndapbor Saiborne General Secretary ba rim ka KSU, Bansuk Thabah Finance Secretary ba rim ka KSU, Bantylli Nari Vice President ba rim ka KSU bad Richard Nongbet.
Haba kylli ïa u bah Paul kaei kaba u iohi haba u la poi ha katei ka phatok kaba u la shong 27 snem mynshwa ryngkat bad kitei ki para nongialam ka KSU u la jubab “ Ka la pynshlei ïa ka mynsiem jong nga namar dei na ka jingshong phatok jong ngi bad jingkyrshan jong ki paidbah , baroh ki dkhot ka KSU, ki Rangbah Shnong bad ki Seng Longkmie ba ngi la lah ban wanrah ka jingkylla ha ka rukom pyntreikam ïa ka EPIC ym ban shu pynrung kyrteng kat ïa uba wan sah ha kane ka jylla bad dei ruh hadien kane ka jingïakhih ba ka sa ïaid ka rukom pynrung kyrteng kaba ïaid beit ïaid ryntih ryngkat ka jingïatrei lang bad ki Dorbar Shnong.
Nangta u la ong “ Nga la dap ka mynsiem bad ka la nang pynskhem ïa ka mynsiem ieid jaidbynriew jong nga . Dei ruh na kata ka daw haba nga la poi ha ka jingïalang jong ki paid Khasi Pnar ha Kashiya Punjee ba la pynlong da ka KSU Barak Valley Circle nga la rai ba ngan ïalam ïa ki nongïalam na katei ka jaka ban leit ïakren bad ka sorkar Assam khnang ba kan pynsangeh ïa ka jingthmu pynkylla Wildlife Sanctuary ïa ki 150 tylli ki shnong Khasi ka ban ktah palat 1.50 lak ngut ki paid Khasi Pnar kiba la im la sah hangthie naduh ka por ki Syiem hyndai jongngi”.