Hadien 23 snem ryngkat ki ummat pynkut noh u Ronaldo ïa ka jingïaid lynti ha ka World Cup

Dallas, Naitung 07 : U Cristiano Ronaldo la 23 snem mynta marwei hi kum u rangïalehkai u la kit ïa ka jingkyrmen jong ka ri Portugal baroh kawei da kaba ïoh ban ïalam ïa ka ri haduh hynriew ban aireng ha ka UEFA European Championship bad kumjuh haduh hynriew sien ha ka FIFA World Cup.
Kum u kapten bad kum uwei na ki rangïalehkai ba rangbah tam ha kane ka FIFA World Cup, ka thong ba hakhmat eh jong u Ronaldo ka long ban ai ïa kaba bha tam na ka bynta ka ri bad ruh ban shongthait noh syndon na ka kam ïalehkai phutbol ban mihkhmat ïa ka Ri ha ki lympung ïalehkai barri.
U Ronaldo u la mih madan nyngkong eh na ka bynta ka Portugal ha ka 20 tarik Nailar, 2003 kum u samla uba dang 18 snem ka rta ha ka jingïakhun pyrshah ïa ka Kazakhstan. Ym shym la slem hadien kata u la thep ïa ka kol ba nyngkong eh ha ki jingïalehkai international pyrshah ïa ka Greece ha ka Euro 2004. Namar la ithuh ïa u naduh dang sdang kum u nongïalam uba don ka sap jingïalam, la thung ïa u kum u Captain shuwa ka Euro 2008, bad naduh kata ka por u la bat ïa kane ka kam da ka jingsarong bad ka jingaiti lut.
“Kane kan long ka World Cup kaba khatduh jong nga,” la ong u Cristiano Ronaldo shuwa ka jingïakhun Round 16 pyrshah ïa ka Spain ha ka FIFA World Cup 2026.
Katba ki snem ki nang ïaid, u Ronaldo u la pynpra ïa jan baroh ki rekod ba kongsan ha ka jingïalehkai phutbol, la ka long ha ka jingthep kol ne ha ka jingïadon bynta ha ki jingïakhun. Ha u snem 2014 u la kylla long u nongthep kol ba bun tam ha ka histori jong ka Portugal da kaba tam ïa ka rekod ba 47 kol jong u Pauleta. Ha u snem 2021, u la kylla long ruh u nongthep kol ba bun tam ha ki jingïalehkai international ha ka histori jong ka phutbol ha ka pyrthei da kaba tam ïa ka rekod ba 109 kol jong u Ali Daei.
Wat hadien ba u la poi sha ka jingïalehkai kaba 200 na ka bynta ka Portugal ha u Jylliew 2023, ka mynsiem jingïakhun jong u kam shym la hiar satia. Ha ka rta kaba 41 snem, ha ka 23 tarik Jylliew 2026, u la rung biang ha ka histori da kaba thep kol pyrshah ïa ka Uzbekistan ban long u rangïalehkai ba nyngkong eh ha ka histori ban thep kol ha hynriew tylli ki FIFA World Cup bapher bapher.
Haduh mynta, u Ronaldo u la thep haduh 146 tylli ki kol na ka bynta ka Portugal, kaba long ka rekod ba khraw tam ha ka histori jong ki jingïalehkai international.
Ki lympung ïalehkai ba u la shim bynta – U Cristiano Ronaldo u la ïashim bynta ha ki hynriew tylli ki jingïakhun jong ka FIFA World Cup kata ha u snem 2006, 2010, 2014, 2018, 2022 bad 2026. Ha kajuh ka por u la mih madan haduh hynriew sien ha ka UEFA European Championship (2004, 2008, 2012, 2016, 2020 bad 2024), kaba long ka rekod kaba ym pat lah ban ïaryngkat da kino kino kiwei pat ki rangïalehkai.
U la ïashim bynta ruh ar sien ha ka UEFA Nations League Final (2019 bad 2025) bad ka Confederations Cup 2017, bad u la lah ban thep kol ha baroh ki lympung ba heh lait noh tang ha ka Euro 2024.
Ki rekod International haduh mynta – Une u rangïalehkai u la ïoh ban mih madan haduh 233 sien bad ïoh ruh ban thep haduh 146 tylli ki kol. Kumta baroh ar ki long ki rekod ba khraw tam ha ka histori jong ka phutbol ha ka pyrthei.
Hat-trick : U la ïoh ruh ban thep haduh 10 sien ki hat-trick, kynthup ar sien ba u la thep haduh saw kol ha ka juh ka jingïalehkai.
Ki jingjop kum u rangïalehkai jong ka Portugal: 141 tylli ki jingïakhun kiba long ki jingïakhun ba jop bun tam da uno uno u rangïalehkai ha ka histori jong ki jingïalehkai international.
FIFA World Cup – U la ïashim bynta haduh 6 tylli ki World Cup bad ïoh ruh ban thep 11 tylli ki kol bad kylla long u nongthep kol ba bun tam ha ka histori jong ka Portugal ha ka World Cup, da kaba tam ïa u Eusébio uba thep 9 kol.
Ha kajuh ka por u kylla long u rangïalehkai ba nyngkong eh ha ka histori ban thep kol ha baroh 6 tylli ki FIFA World Cup bapher bapher.
U ïoh ruh ban bat ïa ka nam kum u rangïalehkai ba nyngkong eh ban ïalehkai ha ka jingïakhun knockout jong ka World Cup ha ka rta kaba 41 snem ne palat.
Ka jingïaid lynti kaba jngai tam ha ka World Cup ka dei haduh ka Quarterfinals kaba la jia ha u snem 2022.
Lada phai ha ki jingbun tylli ki jingmih madan ha ka World Cup, u Ronaldo u la wan ba-ar ha ka jingbun tam ki jingïadon bynta ha ka FIFA World Cup da ki 25 sien namar u Lionel Messi u wan ba nyngkong da ki 27 sien.
Ha ka lympung UEFA European Championship – U Ronaldo u la ïa shim bynta haduh 6sien bad u la thep ruh haduh 14 tylli ki kol kabaka rekod kum u nongthep kol ba bun tam ha ka jingïakhun final jong ka Euro.
Nalorkata, u la ïarap ruh ïa ka kynhun ban rah ïa ka nam lahduh ha ka Euro 2016, kaba pynlong ïa u kum u kapten ban thaw history kaba nyngkong eh ha ka phutbl jong ka ri Portugal.
Ka FIFA World Cup, ka dang sah sa tang ma ka kum ka nambah kaba u Ronaldo um pat ïoh ban rah. Kane ka long ka jingïakhih mynsiem kaba khraw tam jong u ban pyrshang sa shisien ha ka World Cup 2026.