Haba pyrkhat ïa ka roi ka par buh hakhmat ruh ïa ki 200 million ki Jaidbynriew Riewlum: VC Niti Aayog

Shillong, Risaw 11: U Vice Chairman ka Niti Aayog, u Suman Kumar Bery u la ong lada ka sorkar ka kwah ba kawei ka bynta ruh kam dei ban sahdien hynrei kan kiew ha ka roi ka par ka dei ban pyrkhat khia bha bad buh hakhmat ruh na ka bynta ki 200 million ki Jaidbynriew Riewlum kiba don ha ka ri.
U la ong ruh ba u myntri rangbah duh jong ka Ri India u la shim khia na ka bynta ka jingbit jingbiang jong ki riewlum hapoh ka Ri India.
U Bery uba la wan ïuh kjat eh nyngkong sha kane ka jylla bad kane ka thaiñ hi baroh kawei mynta ka sngi u la leit ïuhkjat ruh ha ka Ophis jong u Syiem ka Hima Mylliem.
Haba kren sha ki lad pathai khubor hadien ka jingïakynduh bad u Syiem jong ka Hima Mylliem u Paiem Ainam Manik Syiem bad ki myntri ha ka jigndon lang u CEM jong ka KHADC bah Pyniaid Sing Syiem bad ki EM ula ong ba ki riewlum baroh shikatta kim shym la ïoh ïa ka jingkyrshan kaba thikna lyngba ki skhim jong ka sorkar pdeng.
Kumta na ka liang jong ka Niti Aayog kaba peit ïa ka Ri baroh kawei, ym tang ha ki jylla mynta kala sngewthuh ïa ka jingdon kam jongki riewlum ka long kaba kongsan, namar lada phi kwah ban kyntiew ïa ka roi ka par ba ym dei ban don kiba shah ïeh sha dien ym dei ban klet ïa ki 200 million ki riewlum ha ka ri.
Haba phai sha ka thaiñ shatei lam mih ngi ka Ri India ki dei ki riewlum, ha Meghalaya ki dei ki riewlum bad kane ka dei ka sien kaba nyngkong ba u wan kum ki heh jong ka Niti Aayog sha kane ka thaiñ kumta u kwah ban tip ïa ka jinglong ki riewlum.
Kawei pat ka bynta ka long ba ka kurim jong u ka don ka jingïadei ha kane ka jylla Meghalaya bad u tip ba don ki District Council kiba don ïa ka bor kumta u don ka jingthrang ban sngewthuh ïa ka bor jong ki bad kaei kaba ki leh bad ïa kane la ïakren ha ka jingiakynduh bad u myntri rangbah ka jylla U Conrad K Sangma. “Ngam shym la pynkhreh ei ei ruh halor kane ka mat jong ki Autonomous District Council (ADC) khamtam ha kaba ïadei bad ka jingbei tyngka namar kane ka dei ka bynta jongka sorkar jylla ym jongka sorkar pdeng. Hynrei ha kawei pat ka liang ka jingaibor lang ïa baroh ban shim la ki rai ki rai ka dei ka rukom ba la ju leh ha ki ri Europe bad lada kane ka juh ka don hangne ha Meghalaya kata ka biang eh ngan ong” ong u Bery.
Haba kren ba man la ki dong ki shnat jongka India ki don la ka jong ka jong ka rukom im rukom leh u Bery u la ong “ Ngi na ka liang ka Niti Aayog ngi don na ka bynta ban shakri ïa ki jylla. Namar u Myntri Rangbah ruh u ngeit bad ju kren ba ka ri India kan kiew tang lada ki jylla ki kiew lang tangba ym dei tang ban kiew donkam ruh ban sngewthuh kaei kata ka jingkiew ha ki bynta baroh jongka ri”.
Na ka jingiakren ba ha Khasi Hills don ar bynta ki jaka sor bad ki jaka nongkyndong bad ha ki nongkyndong ki don la ka jong ka rukom im ka rukom pyniaid bad ha kane ka jingwan jong u la ong ba u la ïoh bun jingtip shaphang kane, haba ïadei bad ka jingbei pisa ka shong ha ka sorkar jylla ym ha ka sorkar pdeng.
Haba ïadei bad ka jingwan jong u sha kane ka jylla Meghalaya u khlem wan kum u nongmihkhmat na ka Niti Aayok ne ban don kano kano ka jingïakren halor kino kino ki bynta hynrei ka jingwan ka long kum ka jingwan jngoh sngewbha ïa kane ka jylla kumba la ïa kren bad u mytnri rangbah ka jylla u Conrad K Sangma, namar ki myntri rangbah ki jylla ki dei ki dkhot jong ka Niti Aayog.