M P ka Rajya Sabha, na ka jylla, ula kren ha ki khyndiat sngi ba ladep, da kaba ong, ba haba ka sorkar jylla, ka la pynphai ïa ka pisa shna lynti rel, kumta ka jingïakren ïa katei ka mat, ka la kut noh katto.
Ka jingkren jong U MP, ka dei kaba shisha, namar ba haba ka sorkar India, ka la pan noh ïa ka pisa thied jaka kaba T.200 klur bad haba ka sorkar jylla ruh, ka la mynjur ban pynphai noh, kumta ka mat jong ka lynti rel, ka la dei ban kut noh, ha kaba ïadei bad ka laiñ kaba mynta, kaba leit sha Byrnihat bad haba ka long kumta, kaei sha kaba pynlong ïa ka sorkar jylla, ba kan dang thaw ïa ka komiti ban ïakren lynti rel bad ban ïakren ïa ki seng saiñ pyrthei bapher lane ïa ki sengbhalang, kiba la ju ïai pyrshah na ka por sha ka por, ha kaba ïadei bad katei ka mat.
Ha kaba ïadei pat bad ka jingdon bynta jong ki seng saiñ pyrthei, lada dei ka VPP ne ki sengbhalang ruh, ka long kaba sngew donkam ba kin ïashim bynta lang, namar ba katei ka komiti, kam dei satia kaba la dep rai lypa, na ka bynta ban mynjur ïa ka lynti rel, hynrei katei ka dei tang ka jingïamir jingmut, halor katei ka mat bad kumjuh ruh ban leit sha ka sorkar India, ban ïa syllok lang, lada dei ïa ki aiñ kiba dei ban khanglad ïa ka jingrung ki poiwir lane kiwei pat ki lad ki lynti, kiba dei ban shim, na ka bynta ban pynsuk ïa ka leit ka wan bad ban tehlakam ruh, ïa ka rung ka mih katba mon bad haba ka long kumta, ka la dei ïa ka seng VPP, kaba don ïa U MP sha Lok Sabha, ba kan don ha khmat ban ïalam ïa ki seng saiñ pyrthei bad wat ïa ki heh ka sorkar jylla ruh kumjuh, ban ïakren ïa kane ka mat sha ka sorkar India, namar ba lada dei ka mat jong ka lynti rel lane ïa ka mat jong ki aiñ ïada kum ka ILP ne kiwei kiwei, ki dei ki aiñ jong ka sorkar India.
Ka jingdon bynta jong ka seng VPP, kum ka seng, kaba don ïa la u jong U MP ha Lok Sabha, ka long kaba donkam shibun eh, lada ka dei ban ïa thir nia, halor ka jingdonkam lynti rel, sha Khliehriat, kumba ka la don ka jingïakren bad nangta sa kawei pat ka laiñ rel, ka ban ïaid na Garo hills ban hiar sha Bangladesh bad nangta, kan sa wan phai pat sha East Jaiñtia hills bad kan leit phai sha Silchar jong ka jylla Assam.
Hynrei lada ki seng saiñ pyrthei lane ki sengbhalang, kim shim bynta, kan plie lad ïa ka sorkar jylla, ha ka jingïasylla bad ka sorkar India, ba kin shim ïa la ki jong ki rai bad ynda kan dei pat ka por ban sdang pyntreikam, hangta ka sorkar jylla, kan sa aidaw, ba ym don mano mano ba pyrshah, ha ka por, ba ka dang don ka jingïasyllok lang.
Lah ban ong ba jan baroh ki sengbhalang ha ka jylla khamtam kiba na ka East Khasi Hills bad Jaiñtia Hills District ki la pynpaw ïa ka jingpyrshah naduh mynshwa da kaba ong ba lada ka sorkar jylla bad ka sorkar Pdeng kam ai ne pyntreikam ïa ka Inner Line Permit kin ym shah satia ban shna ïa ka lynti rel ha ka jylla bad na ka liang jong u MP ka Rajya sabha u Dr. WR Kharlukhi uba na ka seng NPP u la ïathuh bad kren da kaba shai ba ka sorkar jylla ka la pynphai noh ïa ka song pisa jong ka Tnat Ministry of Railways ka sorkar Pdeng kaba la bhah na ka bynta ka lynti rel ïa ka jylla Meghalaya bad kumba ong u MP ka Rajya sabha na Shillong kane ka lynnong ban wanrah ïa ka lynti rel ha ka jylla Meghalaya ka la kut.
Ha kine ki sngi pat na ka liang Symbud Myntri Rangbah ka jylla u Bah Prestone Tynsong ula pynmih biang ïa kane ka jingthmu ban wanrah ïa ka lynti rel da kaba ong ba ka sorkar kan burom ïa ka rai jong ki paidbah naba kane ka kam ka shong eh ha ka mon laitluid jong ki paidbah bad ka sorkar ka kloi ruh ban shim ki lad ki lynti ban ïada na ka jingwan rung ki briew ba nabar naba u la ong ba kane baroh kadei kaba baroh bad kumjuh ki sengbhalang ki tieng ba ïoh ka jingwan ka lynti rel kan wanrah ka jingwan rung kyrthep ki bar jylla sha kane ka jylla.
