Ha Wah Umngi hap bad ngam jyllop u rangbah: khlem pat ïoh sei ïa ka met jong u

Mawkyrwat, Jymmang 26 : Uwei u Rangbah uba la tip kyrteng kum u bah Sainkupar Lyngkhoi 23 snem karta na ka shnong Lawblei, South West Khasi Hills District u la kum hap bad ngam jyllop katba u dang leit tong doh na ka Wah Umngi ka wah kaba mar khap ha ka East Khasi Hills District bad ka South West Khasi Hills District.
Katkum ka jingïoh lum jingtip la ïathuh ba kane ka jingjia ngam jyllop jong u tei u rangbah ka dei ha ka janmiet jong ka 25 tarik u Jymmang, 2025 ha ka por kumba 6 shiteng 7 duna ei ei ha kaba ka jingjia ha ka jaka ba ki khot ha shar shar kaba don ha shi lynter jong ka Wah Umngi bad ka dei ruh ka jaka ba jngai tang kumba 2 kilometre ei ei na jingkieng jong kane ka Wah Umngi.
Ym tang kata, la ïathuh shuh shuh ba u tei u rangbah u dei na ka shnong Lawbyrtun, Eastern West Khasi Hills District, hynrei ula poi shongkha ha katei ka shnong Lawblei. Shwa ka jingjia, la ong ba une u rangbah ula mih na ïing ha ka por 3 baje janmiet ryngkat 3 ngut ki khynnah kiba ma u u la ïalam bad dei tat ha ka por 7 duna ei ei u la ur bad hap hapoh wah ha ki bynta ba don ka um kaba khlaiñ bha bad kaba long kroh.
Tat haduh ba thoh ïa kane ka khubor, la ong ba ïa ka met jong utei u rangbah u Sainkupar Lyngkhoi, 23 snem karta haduh mynta ka sngi ka 26 tarik u Jymmang, 2025 ym pat shem la ïoh ban sei namar ka jingheh palat ka um ha katei ka Wah Umngi wat lada ka kynhun Special Response Teams (SRTs) na Shillong ryngkat bad ka Fire & Emergency Services (F&ES) na Mawkyrwat ki la pyrshang ban wad ruh.
Halor katei ka jingjia, haba ïoh ban ïa kren bad u bah Swington Lyngdoh u ba dei u Myntri jong ka Shnong Lawblei, South West Khasi Hills District, ula ong na ka liang ka bor shnong Lawblei ki la kyrpad jur ïa ki paidbah jong ka shnong, bad ruh ïa ki briew ba nabar khamtam ïa ki nongkhwai ne ki rawon kiba ju mlien bad smat ban leit khwai na ka wah Umngi ba kin long kiba husiar namar kumba ka long ba ha katei ka wah kum kine ki jingjia kim dei shuh ka sien kaba nyngkong hynrei ki la ju jia teng la jan man ka snem, ba ki briew ki shu duh ei ïa la ka jingim tang na ka daw jong ka jinglehshlur jong ki khlem da pyrkhat ne wad jingtip bha ïa ka jinglong jingman jong ka Wah Umngi ha kum kine ki por lyiur.