Nongpoh, Jymmang 26: Ka jingtorti haka rukom ai jingsumar naduh ki doctor bad ki nongsumar ka Nongpoh Civil Hospital kam dei shuh ka sien ba nyngkong, hadien ba shibun ki jingujor kila mih naka shyntur ki paidbah kiba leit ban shah sumar ha katei ka jaka ai jingsumar ka sorkar, sa katno katei ka jaka sumar ka dang bteng ban sumar torti ïaki paidbah? Hato ka dei ka jingshngaiñ ne ka jingsyier?
Ha kawei pat ka jingjia kaba la pynpaw pyrthei biang ïaka jingtorti ki nongsumar ha katei ka Hospital ka dei hadien ba kawei ka longkmie kaba la leit ban kha khyllung ha katei ka hospital kala lap pynban ïa u kynphad ba mih katba ka dang leit pynjhieh hadien kumba katto katne sngi ba kala mih na katei ka jaka sumar jong ka sorkar hadien ba kala dep ban kha khyllung.
Kum ban shu kdew hangne ba katei ka longkmie kadei na ka shnong Umden Manipur, ha Ri-Bhoi District kala leit ban shah sumar ha katei ka hospital haka 10 tarik Jymmang ban kha khyllung bad ka la ïoh ban mih noh haka 14 tarik Jymmang ban leit phai sha la ïing. Kaba sngew lyngngoh pat ba tang hadien katto katne sngi eiei ba la mih na katei ka jaka sumar, katei ka longkmie kala lap pynban ïa u kynphad ba mih katba ka dang leit shabar u ba la sahkut haka met jong ka.
Kane ka jingleh torti ki nongsumar ha katei ka hospital kala pynlong ruh ïaki nongïalam ka Khasi Student Union Nongpoh Circle hapoh ka jingïalam u Samla Rishot Lapang Assistant Secretary ban leit kynduh syndon ïaka Medical Superintendent jong ka Civil Hospital Nongpoh ka Dr. D Blah ban pan jingshai halor katei ka jingjia bad ban pynlong ka jingtohkit mardor ba kum kitei ki jingjia kim dei shuh ban dang jia nangne shakhmat.
U Samla Rishot Lapang u la ïathuh ba naka liang ki bor pynïaid ka Civil Hospital kila kubur bad pdiang ïa katei ka jingbakla bad kular ruh ban ai ka jingsumar kaba paka sha katei ka longkmie.
