Ha u snem ban wan yn sdang noh ka Shillong Medical College, mynjur ka Kynhun Myntri ïa ka Service Rules

By Mawphor Editor On Nov 28, 2024

Shillong, Naiwieng 27 : Ka sorkar jylla ka la buh thong ba naduh u snem ban wan ki samla pule ka jylla kin lah ban sdang noh ïa ka jingpule doktor ha ka Shillong Medical College.
Ïa kane la pyntip da ka Myntri ka tnad ka Koit ka Khiah ka sorkar jylla, Dr. Ampareen Lyngdoh haba kren bad ki lad pathai khubor hadien ba la wai ka jingïalang jong ka kynhun Myntri.
Ka Myntri ka ïathuh ba ka Kynhun Myntri ha kane ka sngi ka la mynjur ïa ka Meghalaya Health Service Academic Rules,2024 na ka bynta ban ïoh thung noh ïa ki nonghikai ha kane ka Shillong Medical College kaba ka jylla ka la khmih lynti la slem bha.
Shuh shuh ka ïathuh ruh ba khnang ba ka kam kan ïaid stet bad ban ïoh sdang noh ïa ka Medical College ha ka por kaba biang na ka liang ka tnad ka Koit ka Khiah ka la wanrah ïa katei ka Service Rules na ka bynta ban ïoh thung kam ïa ki nonghikai ha katei ka Medical College.
“Ngi dap da ka jingkmen ba ngi ïoh ban leh mynta ïa kane bad mynta ngin ïaid shakhkmat ban pynkhreh pat na ka bynta ban sdang noh ïa ka Shillong Medical College kham kloi,” ka la bynrap biang.
“Ha kaba sdang, ngin pdiang shwa kumba 100 ngut ei ei ki samla pule doktor,” ong ka Myntri da kaba ïathuh ruh ba ka sorkar jylla kan pynlut kumba 16 klur tyngka na ka bynta ka Shillong Medical College.
Ka Myntri ka ïathuh ruh ba mynta ka jylla ka la don lypa ki doktor lajong kiba lah ban shimti kum ki nonghikai. Kumta kane kan pynsuk shuh shuh ïa ka kam namar ki la don lypa na la iing.
Haba pyntip pat halor ka Tura Medical College, ka Myntri ka ong ba hangtei ruh ki khmih lynti ba kin lah ban sdang noh kham kloi watla ki dang don katto katne ki kam kiba ki hap ban pyndep.
Ka kynhun Myntri ha kane ka sngi ka la mynju rruh ïa ka Meghalaya Dental Health Service Rules.
Katkum ka jingïathuh jong ka Myntri, haduh mynta kim pat don satia ïa ka Dental Health Service Rule ha ka tnad ka Koit ka Khiah ka jylla.
“Kane kan ïarap mynta ban pynstet ïa ki kam kiba dang sahteng kaba ïadei bad ka jingpynkiew kyrdan bad kumjuh haba ïadei bad ka jingthung kam kiban pynbha shuh shuh ïa ka jingtreikam ki nongsumar bniat ha ka jylla baroh kawei.