Ha u Rymphang yn plie paidbah ïa u maw mot dur ba shirynieng u Syiem Tirot ha Bangladesh

Shillong, K’lyngkot 24 : U Myntri ka Tnad Arts & Culture Bah Paul Lyngdoh u pyntip ba ka Sorkar kan sa plie paidbah noh ïa u mot dur ba shirynïeng jong u Khla Wait ka Jaidbynriew U Tirot Sing Syiem ha Dhaka, Bangladesh ha u bnai Rymphang mynta u snem..
U Myntri u pyntip ba ïa une u mot yn sa plie paidbah ha ka 16 tarik Rumphang da u Symbud Myntri Rangbah ba khmih ïa ka kam pynroi sor Bah Sniawbhalang Dhar, u ban ïalam ïa ka kynhun ki Heh Sorkar na Jylla.
“Ngan leit synran ïa u namar kane ka prokram ka dei kaba hap hapoh ka jingkhmih ka Tnad Arts & Culture bad ngin sa ai lut ïa ki jingtip ba bniah katba ngi dang jam shajan jong ka 16 tarik Rymphang” ula ong.
U pyntip ba la ai jingbatai ruh hapoh ka jingïalang jong ka Kynhun Myntri ba ka Sorkar kala ïakren na ka por sha ka por ïa kane ka kam bad ka India High Commission ha Bangladesh.
ïa une u mot ba shi rynieng jong u Tirot Sing Syiem la pynwandur da u nongshna mot dur ba pawnam ka Jylla u Bah Raphael Warjri ïa kaba la mynjur da ka Tnad Arts & Culture.