Shillong, Jylliew 26 : Ka kynhun jong ki nongshong shnong ba la noh ka rta hapoh ka lama jong ka Meghalaya State Senior Citizen Forum ha ka sngi Balang ki la leit ban kynduh ïa u Myntri ka tnad Social Welfare ka sorkar jylla, Bah Paul Lyngdoh ban pynsngew ha u shibun ki ishu kiba ïadei na ka bynta ka bha ka miat jong ki.
Haba kren bad ki lad pathai khubor hadien ka jingïakynduh, u Bah Khrawboklang Basaïawmoit u la ong ba haduh mynta hi ki nongshong shnong ka jylla kim pat sngewthuh ïa ka jingmut ‘senior citizen’ bad kiwei ki jingmyntoi ba ki lah ban ïoh.
“Kumta, ngi kum ki nongshong shnong ba la noh ka rta, ngi la ïa lum lang bad thaw ïa kane ka Senior Citizen Forum. Lyngba kane ka Forum ngi la leit kylleng ki shnong ban pyntip ïa ka jingmut jong kane ka Forum, kiei ki jingmyntoi ba ki lah ban ïoh bad kiei ki kamram jong ka sorkar bad ha kino kino kiba ïadei bad ki paidbah ba la noh rta,” u la ong.
La ïathuh ba ka bynta kaba hakhmat eh ka long na ka bynta ki jingmyntoi ha ka koit ka khiah, nangta haba leit ha ki bank bad ruh ha ki hospital, haba shong bos bad ruh ha kino kino ki bynta kaba kum ki nongshong shnong ba la noh rta ki dei ban ïoh.
Shuh shuh ki la ïathuh ba kum ki nongshong shnong ba la noh ka rta ki don ka jingsngewkhia haba ïadei bad ka jingkynrei u drok bad kumta ki kwah ban trei ryngkat ryngkat bad ka Social Welfare na bynta ban ïa khun pyrshah ïa u drok.
Kawei pat ka bynta kaba ki nongïalam ka Forum ki pynpaw ha u Myntri ka long ba ki lap ba ha ki hospital kito kiba la noh ka rta ki hap ban thiah lang kajuh bad kito kiba dang samla. Kumjuh ki ong ba kane ka ju jia wat ha ki jaka shim dawai ne wat ha ki bank ruh ba ki hap ban ieng laiñ lang kumjuh bad kito kiba dang khlaiñ dang eh.
“Kum ki senior citizen ngi dei ban ïoh kham kyrpang. Ïa kane ngi la dep ban ïa kren bad ka Civil Hospital kaba la pdiang ban ai noh da ka ward kaba kyrpang na bynta jong kiba la noh ka rta,” bynrap biang u General Secretary.
