Shillong, Naitung 09 : U MP ka Congress na Shillong, Bah Vincent H Pala u la thoh sha u Myntri Rangbahduh ka Ri, u Narendra Modi ban kyrpad ba un pyllait noh ïa ka Meghalaya bad kiwei ki jylla ba hap ha ka Khyrnit ba Hynriew na ka Uniform Civil Code (UCC).
“Nga kwah ban kyrpad ba phin pyllait noh ia kito kiba hap ha ka Khyrnit ba Hynriew na ka Uniform Civil Code. Kane kan long ka dak ban iada ïa ki riti dustur ba bun rukom jong kane ka ri ba ïar ba khamtam ïa ka riti dustur jong ki jaidbynriew riewlum kiba don ka bynta kaba kongsan tam ha ka jingpynneh ïa ka mynnor,” ong u MP ha ka shithi sha u Modi.
U Bah Pala uba dei ruh u President jong ka Meghalaya Pradesh Congress Committee u la kyntu ruh ïa u Myntri Rangbahduh ban shimkhia ka katei ka bynta na ka bynta bna pynneh ïa ka hok bad ka riti dustur jong ki riewlum da kaba pyntikna ba ka UCC kan ym don jingktha ïa ka rukom im bad ka riti kaba ki bud naduh hyndai haduh mynta mynne.
“Dei ban burom ïa ka jingriewspah ka riti bad ka kolshor jong ki jaidbynriew riewlum kiba don ka bynta kaba kongsan haka jingpynneh pynsah ïa ka mynnor jong ka Ri,” u la ong.
Katkum ka jingong jong u, ka Khyrnit kaba Hynriew jong ka Riti Synshar jong ka Ri ka don ka kyndon kaba kyrpang kaba la ai sha ki riewlum ha Assam, Meghalaya, Tripura bad Mizoram ban ïada ïa ka jinglong kyrpang jong kitei ki riewlum kiba don ha kine ki thaiñ.
“Kumta, ka long kaba donkam ban pyntikna ba ka UCC kam dei ban treikam ha kitei ki thain khlem ka jingmynjur da ka Iing Dorbar jong kato ka jylla. Kano kano ka jingpyntreikam ïa ka UCC ha kitei ki Jaidbynriew kam dei ba ka ktah tang ïa ka hok jong ki hynrei ka pynduh noh ruh ïa ka jinglong kyrpang kaba ki la bud pateng pakit na kawei ka pateng sha kawei pat,” u la bynrap biang.
Shuh shuh u ong ruh ba donkam ruh ban peit ba ka don ka jingpyrshah kaba jur ba ka UCC ka la mad ha ki jylla kum ha Meghalaya, Mizoram bad Nagaland ha kaba bun na ki nongshong shnong ki dei ki khristan.
