Ha sien ba nyngkong ïoh kyntiew lama khlem shah pynwit ka HNLC ban kynmaw dap 36 snem ka Seng

Shillong, Nailar 14: Ka Seng HNLC ha ka sien kaba nyngkong eh ka la ïoh ban rakhe laitluid ne rakhe ha kaba paw khlem don kano ka jingpynwit ïa ka jingdap 36 snem ka jingmih ka Seng lane ka Raising Day.
Ïa kane ka Raising Day la pynlong ha jaka sah ba shipor jong ki nongïalam ka Seng kiba don mynta hapdeng ka jingïakren ïasuk bad ka sorkar, kata ha IB jong ka MeECL kaba don ha Umïam, RiBhoi District.
U Vice Chairman jong ka HNLC, u Bah Manbhalang Jyrwa u la kyntiew ïa kalama jong ka Seng ha kaba la ïadon lang ruh kiwei de ki nongïalam jong Seng bad la ïoh sngew ruh ba la don ba rwai ïa ka jingrwai “Ri Hynñiewtrep.. Ri Hynñiewtrep” da ka Sur jong ka jingrwai “Ri Khasi Ri Khasi”.
Ha ki snem kiba ladep, ka HNLC ka ju rakhe ïa kane ka Raising Day ha ka 14 tarik u Nailar man la ka snem, da kaba sieh lama ha kino kino ki bynta jong jylla lane da kaba kyntiew ïa ka lama jong ka Seng ha ki jaka jong ki dkhot ka Seng ha ki jaka bym ju pynpaw.
Hynrei mynta ba ka Seng ka don hapdeng ka jingïakren ïasuk, ki nongïalam ka Seng kiba don ha ka jylla ki la pynlong ïa kane ka jingkynmaw burom ïa kane ka sngi ba ka Seng ka la mih pyrthei ne la seng ïa ka.
Lah ban kdew hangne ruh ba dang hynnin ka sngi, ki nongïalam ka Seng hapoh ka jingïalam u Bah Manbhalang Jyrwa, ki la leit buh syntiew ha lum jingtep jong u Bah Cherishterfield Thangkhiew ha Mawlai ha ka jingdap ar snem ka jingshah siat ïap jong u General Secretary barim ka Seng.