Mynjur ka sorkar pdeng ban bteng ki samla pule ba phet iap na Manipur ban pule ha Kyrdemkulai
Shillong, Nailar 14 : Ka tnad kam rep kam riang jongka sorkar pdeng (Union Agriculture Ministry) ka la mynjur ïa ka jingkyrpad u Myntri Rangbah ka jylla u Conrad K Sangma ban shah ïa ki samla pule ka jylla kiba pule baroh shi katta ha ka Central Agriculture University,(CAU) Imphal hynrei kiba hap ban phet iap na katei ka jylla namar ka jingkulmar sngewïapher jaidbynriew ba kin bteng ïa ka jingpule jongki ha ka Central Agriculture University (CAU) Campus Kyrdemkulai, Ri Bhoi Distrct.
Kat kum ka jingpynbna ba la pynmih da ka CAU Imphal ha ka 14 tarik Nailar 2023 ka la pynpaw ba ka University ka la rai ban sdang ïa ki klass na ka bynta ki samla pule Undergraduate kiba shabar ka Manipur kiba pule ha ka College of Agriculture, Imphal bad College of Food Technology, Imphal naduh u snem 2021,2021-22 bad 2022-23 yn sdang noh lyngba ka Online.
Lah ban pynkynmaw u Myntri Rangbah ka jylla ha ka 7 tarik mynta u bnai ha ka jingleit sha New Delhi ryngkat bad ki Myntri jongu ki la ïa kynduh bad ai ïa ka shithi ha u myntri kam rep kam riang ka sorkar pdeng u Narendra Singh Tomar ha kaba la kyrpad ïa u ban shah ïa ki sala pule jongka Meghalaya kiba hap ban phet noh na Imphal na ka jingkular sngewpher jaidbynriew ba kin bteng noh ïa ka jingpule jongki ha CAU Campus Kyrdemkulai khnang ba kan ym don ka jingthut jongka jingpule jongki.
Ka CAU Imphal ka la pynpaw ba ïa kane ka jingpynbeit la leh namar ka jingkulmar ha Manipur bad ïoh pdiang ia ki jingkyrpad na ki kmie ki kpa ki samla pule bad wat na ki bor sorkar jongka jylla Meghalaya ruh.
Shuh shuh kat kum ka jingpynbna na u Registrar u T.R Sharma la pynbeit ba ki Masters bad PhD Klass jongka College of Agriculture Imphal ruh kin sdang noh lyngba ka Online.
Na ka bynta ki RAWE Prokram jong ki samla pule 2020-21 B.Sc Agriculture kin bteng ha ki jylla la jong jongki.
Na ka bynta ki samla pule M.Sc bad PhD kiba pule ha ka College of Agriculture bad kiba la pyndep ïa ki jingpule jongki ki hap ban bteng ïa ka kam wad bniah ne research ha ki College CAU ba marjan, ICAR ne KVK da ka jingïapynbeit lang bad ki nonghikai ne nongpyntbit (guides) jongki.
Na ka bynta kito ki samla pule kiba la jan dep artat (final stage) ka jingpule ïa ka M.Sc ne PhD ki lah ban bteng ban thoh ïa ki Thesis jongki da ka jingïamir jingmut lang bad ki guides jongki khnang ba kin pyndep ïa ka jingpule ha ka por kaba biang.