Shillong, Naiwieng 04: Da ki spah ngut ki nonghikai Primary na kylleng ki jylla jong ka ri India ki la ïashim bynta ha ka General Council Meeting jong ka All India Primary Teachers’ Federation (AIPTF) kaba la long Madan Polo, Shillong.
Kane kadei ka sien kaba nyngkong ba ka Meghalaya ka la pdiang ïa ka jingïalang bah jong ki Nonghikai Primary ha ri India, ha kaba la pynbit pynbiang da ka All Meghalaya Primary Teachers Association (AMPSTA).
Ka jingïalang kaba la sdang naduh hynnin ka sngi, ka la ïatai bad ïakren halor kiba bun ki mat bad khamtam ïa ki jingeh ba ki Nonghikai ki ïakynduh.
U Secretary General jong ka Federation, u Kamala Kanta Tripathy, haba wanrah ïa ka report halor ka jingtreikam jong ka Seng, u la ïathuh ba kumno ki Nonghikai ki la hap banmad bun ki jingeh ha ka por ba wan ka jingpang khlam, namar ba kim shym ïoh lad shuh ban shim klas ne ban hikai ïa ki khynnah bad ki hap ban shim da kiwei pat ki lad ki lynti. “Ka jingpang COVID bad ka jingkhang dam ki la long ki jingeh kiba hakhmat duh ba ki nonghikai Primary ki la ïakynduh”, la ong u Tripathy.
Ha kane ka jingïalang bah u Secretary General, u la ïathuh ba kiwei pat ki jingeh ba ki nonghikai Primary ki ïakynduh bad la ïakren ruh ha kane ka jingïalang ka long ka penshon, ka jingbym ïoh tulop bad kiwei kiwei de.
U Kongsan ha kane ka jingïalang u long u Bah DP Wahlang, IAS, uba long u Chief Secretary ka jylla Meghalaya.
Ha kane ka jingïalang la ïoh ruh ki jingshad tynrai na Jaiñtia, Khasi bad Garo.
Lashai ka sngi ka AMSPTA kan leit ïalamkai pyngngad ïa kine ki Nonghikai ba wan nabar jylla sha Sohra bad ha ka 6 tarik kin leit phai noh sha la ki jong ki jylla.
