Shillong, Jylliew 24: Ka Shillong Municipal Board (SMB), ha ka sngi Nyngkong, ka la aiti ïa ka dur jong u nonglum pisa beaiñ ha ka kyrteng ka Shillong Municipal Board (SMB) na ki nongshong dukan madan ha Shillong.
Ha ka kyrwoh khubor ka SMB ka la ong ba nalor kane, ka Board ka la aiti ruh ïa ka receipt ba la shna thok, kaba la sam da une u nonglum pisa sha ki nongshong dukan madan.
Ïa kine ki sakhi, ka SMB ka la aiti sha ki Pulit ha ryngkat ka ejahar ba kyntu ïa ki Pulit ba kin kem bad ai jingpynsajia ïa une u briew katkum ki kyndon Aiñ, ong ka kyrwoh khubor.
Lah ban pynkynmaw hangne ba dang ha ki khyndiat bnai, u Chief Executive Officer (CEO) ka SMB ula ujor ejahar sha ki pulit ba pyntip halor ka jingdon u runar uba leit khrong/lum pisa beaiñ na ki dukan madan ha ka kyrteng jong ka Board.
La pyntip ba une u runar u la shna thok ïa ka receipt ha ka kyrteng jong ka SMB bad u la leit lum pisa na ki dukan madan halor ka nongrim ba pynrung kyrteng ïa ki nongshong dukan madan.
Ka Shillong Municipal Board (SMB), ha ka sngi Nyngkong, ka la aiti ïa ka dur jong u nonglum pisa beaiñ ha ka kyrteng ka Board (SMB) na ki nongshong dukan madan ha Shillong.
La ong ba une u runar ula shim kabu namar ka jingïaid ka jingpynrung kyrteng ka Town vending Committee (TVC) ïa ki nongshong dukan madan katkum ka Meghalaya Street Vending (Protection of Livelihood and Regulation of Street Vending) Scheme, 2023.
Ha ka kyrwoh ba la pyllait da u CEO, ka TVC kam shym la shim pisa satia ban pynrung kyrteng ïa ki nongshong dukan madan kumba ka long haduh mynta.
