Jowai, K’Lyngkot, 24: Ka Executive Committee jong ka Kur Phawa-Siangshai, seng kmie ka sngewkmen shikatdei eh ban pyntip sha baroh ki para kur para jait, naduh ki Chairman, ki Secretary bad ki nongkitkam jong ka Kur ha ki shnong ki thaw bad ki Unit bapher bapher bad ïa ki para kur Lyngdoh Phawa, ki kur sin jong ka kur Phawa bad Siangshai, ba kan don ka Dorbar Kur- 8, ha ka 27-01-2024, haka por 10:00AM, ha ka shnong Mutong, East Jaiñtia Hills District, kumba ju long man la u snem.
Kumta, ka seng kmie ka kur Phawa- Siangshai ka khot ka wer sngewbha ban wan khnang khnang sha kane ka jingïalang kaba ha khlieh duh jong ka Kur, ha kaba yn ïoh sngew bad tip ïa ki kam bad ki jingthmu jong ka Kur Phawa-Siangshai Seng Kmie (Central Body).
Ka seng kala khot la wer khamtam eh ïa ki long kmie, ba kin shim khia ban wan ïalam ryngkat ïa la ki khun ki kti, ki khun samla kiba la pule ha skul ne kolej ne ha ki skul bah, ba kin dup long kiba shlur ban wan sha khmat ha ki kam jong ka Kur bad ba kin long ki briew kiba tip kur tip jait, kiba tip briew tip Blei bad ruh kan ïarap ïa ki ban ïa ithuh ithaw iwei ïa iwei pat haka jingïaidlynti ka jong ki, kin tip ruh ïa ki para kur kham tam ha ki shnong ki thaw la jong, hynrei, sha kiwei pat ki shnong ki jaka kiba don ki para kur.
La kyrmen skhem lyngba kane Dorbar Kur, yn sa tip bad ïoh sngew ïa ki jingthmu jong ka Kur ha ka ban shakri na ka bynta ki para kur para jait, ban ïaleh katba lah ban lait na ka sang ka ma, ban lait na ka jingsniew ha kane ka juk ba mynta. Ka Kur ka kwah eh ban don borabor ka bha ka miat bad kan don ka shong suk shong saiñ ha ka Kur hi baroh kawei.
Yn sa ai khusnam ïa ki khun samla jong ka Kur kiba wan sha khmat eh ha ka jingpule ka jong ki bad ruh yn sa pynkup burom ïa ki riew tymmen jong ka Kur. Kin don bun ki jingrwai jingshad na ki sap ki phong jong ki para kur ki ban pynsngew tynnad ïa katei ka sngi.
