Nongstoiñ, K’lyngkot, 24: Ka jingdon jong ki riew shim kabu ha West Khasi Hills ban wiang ding pathar ïa ki khlaw ki btap, ka ktah haduh katta katta ïa ka mei mariang bad ïa ka jingitynnad jong ki sawdong sawkun. Katei ka jingwiang ding pathar kam dei tang ha ki jaka ba kham pajih na ki shnong ki thaw, hynrei wat harud ka surok bah bad ha ki jaka ba ki ïing ki sem jong ki nongshong shnong ki don.
Haba kaba ïadei bad ka jingwiang ding pathar, man la u snem ka ju don ka jingpluh jong ki ïing ki sem jong ki nongshong shnong. Hynrei ym pat ju kham don koit ba ïa kiba donkti ha kaba wiang ding la ïoh ban kem da ki paidbah ne ki bor shnong, namar ym ju kham lap ïa ki. Kawei ruh ka dei namar ka jingbym shimkhia jong ki bor shnong ban tohkit na ka bynta ban lap ïa ki bad ban pynshitom katba shong ka aiñ.
Haba phai ha ka jingwiang ding pathar ïa ki lum bad ki khlaw, ym lah ban len ba ka pynduh jait lut ïa ki kynja kynbat dawai kiba kordor kiba don ha ki khlaw ki btap bad ki jaka sngem. Ka pynjot lut ïa ki tynrai dieng kiba dang rit kat kiba ka thylliej ding ka dang lah ban klang.
Halor katei ka jingwiang ding pathar don ruh kiba ong ba ki da leh khnang ïa katei ka kam, khnang ba u phlang lung un mih kloi na ka bynta ba ki jingri jingdup kin ïoh ban bam. Hynrei katei ka jingong jong ki ka dei tang ka jingpyrkhat biej ka bym lah ban pdiang. Ym tang katta ka jingwiang ding pathar ka pyn tyrkhong ruh ïa ka khyndew, namar haba la wan u slap ka um ka kit lut ïa ka sboh kaba la kylla dpei bad ha ka por ba shit ka sngi ka khyndew ka rkhiang noh bad ki phlang ki kynbat ki shim por bha ban san bad suki suki ki duh jait noh.
Halor ka jingdon jong ki riew shim kabu ban wiang ding pathar, ka la don kam ïa ki bor synshar shnong ba kin shimkhia bad ba kin thaw ki lad ki lynti, kumno ban pynshai sha ki paidbah ba katei ka jingleh ka ktah ym tang ïa ka mariang bad ka khyndew. Hynrei ka ktah ruh ïa ka hok jong ki paitbah ki bym kwah ban pynsan pynheh ïa ki dieng kiba mih ha ki jaka ki jong ki.
Ban pynduh ïa katei ka jingmlien ba sniew ka shong ruh ha uwei pa uwei u nongshong shnong, ba un shim ka jingkitkhlieh ha la marwei marwei, ba un hap ban sngewthuh ba na ka bynta ban ïoh ïa ka mariang kaba itynnad bad kaba khuid, ka donkam ban kiar ha kaba pynjot ne thang dusmon ïa ki lum bad ki khlaw ki btap.
