Nongstoiñ, K’lyngkot, 24: U District Magistrate ka Eastern West Khasi Hill District, Mairang u bah G Kharmawphlang IAS, u la pyntreikam da ka kyndon 144CrPC, kaba khang bad mana pyrshah ïa ka jingïaid jong ki kali bad trok kiba ïaid ha shilynter jong ki surok jong ka Eastern West Khasi Hills District, khamtam ha ki surok Mawmaram-Nongthliew-Mawmih-Mawlyndep.
Ka jingïaid jong ki kali kiba kit palat ïa ka 9 ton ha kine ki surok kala pynjot bad pynjulor ïa kine ki surok bad ka wanrah ruh ïa ka jingma ïa ka ïaid ka ieng jong ki nong shong shnong bad ïa kiba ïaid lynti na kine ki surok. Kumta lada lap ïa kiba ïaleh pyrshah yn pynshitom katkum ka kyndon aiñ 188 jong ka Indian Penal Code. Kane ka jingmana kan treikam noh mardor naduh ba la pynmih ïa kane ka hukum.
Shuh shuh, u District Magistrate ka Eastern West Khasi Hill District, u bah G Kharwanlang IAS, u la pyntreikam da ka kyndon 144 CrPC. kaba khang bad mana pyrshah ïa ka jingtih bad khlong maw beaiñ ha shi lynter ka surok Tiehnongbah-Laitnongrim.
Kane ka jingtih bad khlong maw beaiñ ka wanrah ka jingpynjot pynsniew ïa ka surok. Ka wanrah ruh ïa ka jingma ïa ki nongshong shnong bad ki briew kiba ïaid lynti na kane ka surok. Kino kino kiba ïaleh pyrshah ïa katei ka hukum yn pynshitom ïa ki katkum ka kyndon 188 jong ka Indian Penal Code (IPC).
