Shillong, Jymmang 05 : Ka Shillong Lajong FC, kaba dei ka klob ïalehkai phutbol na Shillong kan sa aireng pyrshah ïa ka klob na Kolkata ka United Sports Club ha ka lympung ïalehkai 2nd Division League 2023 ha madan ba dang dep siang thymmai ïa u phlang plastik (turf) jong ka Shillong Sports Association ha madan First Ground ha Polo kaban sdang ha ka por 3 baje janmiet.
Haba kren sha ki lad pathai khubor u Bah Boby L Nongbet u coach ka Shillong Lajong u la pynpaw ïa ka jingkmen ba ki la ïoh rung sha ka Final Round jong ka 2nd Division League.
U ong ruh ba ha kane ka final round ka jingïakhun ka long kaba jwat bha bad mynta ki don sa tang san tylli ki kynhun ban ïakhun bad ar tylli ki kynhun kiba heh point duh kiban ïoh rung sha ka I-League kaban ïakhun ha u snem 2024.
U pynpaw ruh ïa ka jingkyrmen ba kin jop ha ka jingïalehkai ba nyngkong ha la ïing, “Ngin pyrshang ban ïakhun tyngeh ban ïoh khur ïa ki lai point ha ka jingïakhun ha ka sngi Saitjaiñ,” ong u Bah Boby.
Ki san tylli ki kynhun kiba ïakhun ïa ka final round jong ka 2nd Division League ki kynthup ïa ka Shillong Lajong FC, Delhi FC, Ambernath United Atlanta FC, FC Bengaluru United bad ka United Sports Club.
Ka Final Round kan sdang ha ka 6 tarik bad kan kut ha ka 26 tarik u Jymmang, 2023.
