Ha kyrteng u Fr. Sngi pynkup burom ka KSU ïa 75ngut ki samla ba pass bha na Ri Bhoi District
Ryngkat ka rakhe lyngkhuh sngi ïap u Syiem Tirot Sing Syiem
![](https://mawphor.com/wp-content/uploads/2023/07/WhatsApp-Image-2023-07-17-at-7.07.40-PM-1.jpg)
Nongpoh, Naitung 17: Da kaba kynmaw burom ïa ka lyngkhuh sngi ïap ba 188 snem u Syiem Tirot Sing Syiem kum u khlawait ka jaid bynriew uba la ïa khun pyrshah ban pynioh ïa ka jinglaitluid na ka jingsynshar donbor ki phareng bad ha kajuh ka por ban pynshlur ïa ki samla pule ka dong Ri Bhoi, ka Khasi Student Union, North Khasi Hills District Unit mynta ka sngi ka la lah ban pynkup burom ïa ki 75 ngut ki samla pule ka Ri Bhoi kiba la pas bha ha ki examination bapher bapher nalor ba ki la leh burom ïa kane ka lyngkhuh sngi ïap ba 188 snem u Tirot Sing Syiem.
Ïa kane ka jingleh burom ïa kane ka lyngkhuh sngi ïap jong u Pairm Tirot Sing Syiem bad ba la pynkup burom ïa ki samla pule ka dong Ri Bhoi la pynlong mynta ka sngi ha District Library Auditorium Hall, Nongpoh.
Haba pynkup burom ïa kitei ki samla pule shynrang bad kynthei ka KSU ka la ai nam ïa u (L) Fr. Sylvanus Sngi da kaba ai kyrteng ‘Fr. Sylvanus Sngi Lyngdoh Maitshaphrang Academic Excellence Award’ kaba la dei ha ka sienjam kaba ar ba kum ka seng ka la pynshlur ïa ki sala pule da kaba ai ïa ki khusnam kyrpang ba ki dang don kata ka mynsiem ban bteng ïa ki jingpule sha ki kyrdan kiba shaneng ba kum ka jaid bynriew ka dang donkam ïa ki samla kiba la stad la nang ban don ka jingkitkhlieh ban trei na ka bynta ka ri bad ka jaid bynriew.
Kine ki samla ba pynku burom ka KSU, ki kynthup naduh ki examination ha ka kyrdan SSLC, HSSLC, Degre bad kynthup ruh kiba la pyndep ïa ka kyrdan PhD bad nalor ki 75 ngut ki samla pule, ki 20 ngut ki dei ki samla kiba rung ha ka thup jong ka top 20 bad top ten jong ka SSLC bad HSSLC.
Kum ka jingkynmaw burom ïa u Paiem Tirot Sing Syiem, ka KSU ka la leh burom ruh ïa une u riewshlur ka jaid bynriew ha kane ka lyngkhuh sngi ïap ba 188 snem da kaba pynlong ïaka jingsngap jar kaba 1 minit bad la pyniphuh pynphieng ruh ïa kane ka sngi kyrpang da ka put ka tem bad ka rwai ka siaw na ka kynhun Jong ka Traditional Institute, Ribhoi College.
La sakhi lang ruh ha kane ka sngi bad ban sam ïa ki khusnam da ka jingdon lang u Bah Shemphanglang L Mawphlang, Vice President barim KSU Seng kmie, U samla Pynshaiborlang Rani, Information & Publicity Secretary KSU CEC, u Bah Ferdinand Kharbuli, Lecturer Khasi Dept. Ribhoi College, Samla Albert Sngi Lyngdoh, Pyrsa jong u Late Fr. Sngi, u Samla Ferdinald Kharkamni President Rangbah ka KSU NKHD, Samla James Mawphniang, Secretary KSU NKHD, bah Markus Marten President HNYF Northern Region, ki samla pule, ki kmie ki kpa lem bad kiwei kiwei.
Haba ai jingkren ha kane ka sngi kum ki nongïalam ka KSU, ki la kren kyrpang shaphang ki jinglen lade u Syiem Tirot Sing Syiem kum u syiem uba ïakhun bad ïada ïa la ka jong ka jaid bynriew ban ïakhun pyrshah na ka jingsynshar donbor ki phareng bad ha kajuh ka por ruh ki la ai ki jingkren ai mynsiem ïa ki samla pule kiba la ioh pdiang ïa ki khusnam ba kin dang trei shitom ha ki jingpule bad khamtam ba kin long kita ki samla kiba don ka jingkitkhlieh na ka bynta ka ri bad ka jaid bynriew.