Ha khmat u Dy.SP leit ai jubab u Babu Birbor Riangtem ba shah kawang Tear Gas ki nonghikai

Shillong, Risaw 12: U President ka Meghalaya Government Lower Primary School Contractual Teachers’ Association(MGLPSCTA) u Babu Birbor Riangtem ha ka sngi Balang ula leit ban ai jubab ha khmat u Dy. SP jong ka East Khasi Hills u Dangsan Khyriem ha Police Reserve ba un ai sakhi ne statement halor ka ejar kaba ki la ujor pyrshah ïa ki pulit ki don kti ban pynbthei bom pynsat khmat ïa ki nonghikai bad ki khun ki kti jong ki kiba tur sha Secretariat ha ka 6 Tarik Risaw.
Haba kren sha ki lad pathai khubor hadien ba la mih na ka ophis U Dy.SP u Babu Birbor u la ong ba ka jingkhot jong ki Pulit ka long ba kin ai sakhi ïa kaei ka jingkynnoh jong ki ba ki pulit ki pyndonkam beit da ki pulit shynrang ha kato ka sngi pyrshah ïa ki nonghikai kynthei bad ruh ban pan sakhi halor ka jingpynbthei bom pynsat khmat da ki pulit bad kumjuh halor ka jingmynsaw ki katto katne ki nonghikai na ka jingsiat bom pynsat khmat bad ka jingtied lathi.
“Ha ka jingshisha ki pulit kim donkam shuh ban dang khot pan jingpynshisha na ngi, la ka dei ka jingshisha bym don Pulit kynthei ha kato ka sngi bad ba ki pulit la shuh siat bom sat khmat kaba long ka jingpyndonkam palat ïa ka bor namar ki dur bad ki video jong kato ka jingjia ka la don lut bad saphriang ruh ha man la ki lad pathai khubor,” u la ong.
U Babu Birbor u la ïathuh ruh ba kane ka jingkhot pan jubab ki pulit na ki nonghikai ka long ban ïoh sabut namar na ka liang jong ki ki la pynlong jingtohkit halor ka jingjia ha kato ka sngi ban lap ïa ki jingshisha baroh. U la pynpaw ruh ba na ka liang jong ki nonghikai baroh ki dap da ka jingkyrmen ba ka sorkar kan leh ïa kaba dei halor kane ka bynta.
Haba la kylli la ki don jingshaniah ba kan mih soh ka jingtohkit, u Babu Birbor u la pynpaw ba na ka liang ka jong u bad ki nonghikai hi ki pynpaw jingartatien ban seisoh ka jingtohkit namar kiba bun bah ki jingtohkit ka sorkar kim ju poi shano shano ruh.
“Kam dei tang ka jingtohkit halor jong u Bah Cheristerfield Thangkhiew kaba ym shym mih soh hynrei kiba bun bah ki jingtohkit jong kane ka sorkar hynrei la jar katta ngi kwah ba ka sorkar kan shim khia ban pynmih teng ki soh na kane ka jingtohkit” ong u Babu Birbor.
U la ïathuh ruh ba na ka liang ki pulit ki khot pan jubab na baroh ki nonghikai bad kumjuh ïa baroh ki seng bhalang kiba soi lang ïa ka ejahar.
Haba kren halor ka jingweng syndet ïa ka jingïakhih u Babu Birbor u la ïathuh ba ka jingweng jingïakhih jong ki nonghikai kontrak ka dei hadien ba ki la shong kyrkieh ïa ka jingïalang ban shim rai la kin dang bteng ne sahngeh shuwa ïa ka jingïakhih kaba ki pynlong la palat shibnai.
“Dei ynda ki ïohi ba nga la tlot shaba palat bad ki don ki nonghikai ruh kiba shitom na ka liang jong ngi ngi shim ïa ka rai ban sahngeh shuwa ïa ka jingïakhih jong ngi,” u la ong.
U la ïathuh ruh ba na ka liang jong ki nongïalam ka MGLPSCTA ki dang ïai buddie ïa kane ka kam jong ki ha kaba dang ha ka sngi Ba-ar u la ïakren ruh bad u Bah Prestone lyngba ka phone bad na ka liang jong ki kin sa leit ban ïa kynduh bad u ha kane ka taïew kaban wan.
“Na ka liang jong ngi ki nonghikai kontrak ngi la rai ban ym leit kynduh shuh ïa u Bah Lahkmen wat la u dei makana u Myntri ka tnat pule puthi namar um pat long uba bit dor ban bat ïa kane ka kam namar lada phi peit kat ki jingïakhih ki nonghikai katba ki dang leit kynduh bad u Bah Lahkmen kam ju seisoh eiei dei tad ynda ki la leit kynduh bad u Myntri Rangbah u Conrad Sangma ne u Symbud Myntri Rangbah ka jylla u Bah Prestone Tynsong ba ki ju ïoh kheit ïa u soh bad kane hi ka pynpaw ïa ka jingbym ler u Bah Lahkmen ban bat ïa kane ka tnat bad ngi ruh ngin ym leit kynduh shuh lada u khot ïakren namar kam ju poi shano shano ka jingïakren bad u Bah Lahkmen,” bynrap shuh shuh u Babu Birbor.
U la ong ruh ba ha man ki jingïakhih bunsien kaei ka rai ba mih na ka jingïakynduh bad u Myntri Rangbah ne Symbud Myntri Rangbah ka long mar khongpong bad kaei kaba mih na ka jingïakynduh bad u Bah Lahkmen bad ong ba kane ka pynpaw ba kam don ka jingïasngewthuh jingmut ha ka Sorkar bad ba kam ju don ruh ka jingïamir jingmut para ma ki.
Shuh shuh u la ong ba na ka liang jong ki nonghikai kontrak kin sa leit kynduh ruh bad u Myntri Rangbah bad Symbud Myntri Rangbah ha shuwa ban shim biang ïa kino kino ki rai ïakhih nangne sha khmat.