Nongstoiñ, Rymphang 13: Ka jylla Meghalaya ka dei ka jylla kaba kyrpang tam na baroh ki jylla ha ka ri India naduh ka jinglong ka mariang, ka ktien ka thylliej, ka rukom bat khyndew, ka kheiñ kur kheiñ jait haduh ka synshar ka khaddar. ong u bah Ospear Lyngdoh uwei na ki nongïalam jong ka kynhun ïakhih hill state.
U bah Lyngdoh haba ïakren bad u nongthoh khubor, u la ong ba ym lah ban len ba wat la ka jylla Meghalaya ka dei ka jylla kaba rit bad ka jingdon briew ka duna bha haba nujor bad ki jylla ha ri thor. Hynrei ka dei pat ka jylla kaba ka sorkar India lyngba ka riti synshar ka la ithuh kyrpang, da kaba pynkup bor ha ki lai tylli ki District Council kata ka Khasi Hills Autonomous District Council, Jaiñtia Hills Autonomous District Council bad ka Garo Hills Autonomous District Council.
Ym lah ban len ruh ba ha baroh lai tylli ki District Council ki nongshong shnong ki dei kiba ai jait ha ka kmie kata ki Khasi, Jaiñtia bad Garo. Nalor kata ka ktien ka thylliej jong kitei ki lai tylli ki jaitbynriew ki ïapher kawei na kawei pat hynrei dei tang ka ktien Jaiñtia kaba ïadei bad ka ktien Khasi.
Ym lah ban len ruh ba naduh ba ki lai tylli ki District Council ki la sdang ban treikam, ki nongmihkhmat lane kita ki MDC kiba kam ïalade ba ki dei ki nongthaw aiñ ha ki District Council, ki la pyrshang katba kot la ka bor ban shna ïa ki aiñ ban the song bad ban ïada ïa ka longkur long jait bad ha kine ki sngi ki la sdang ban trei kam hadien ba ka District Council ka la register bad ithuh ïa ki Dorbar kur, ki seng samla, ki seng kynthei bad la pynkup bor ïa ki ba kin trei kam hala ki jong ki jong ki jaka ba ki don.
U la ong ruh ba lada phai sha ki aiñ ba ki District Council ka la lah ban pyntreikam, kum ka aiñ shongkha shongman kaba baroh ngi tip kum ka Indian Marriage Act, kaba la ithuh bad mynjur da ka sorkar pdeng, ka la long ka jingkyrkhu kaba khraw ïa ka jaitbynriew Khasi Jaiñtia. Hynrei ym lah pat ban len ba kumba katto katne snem mynshuwa ka sorkar jylla ka la sdang ban tuklar, da kaba pynmih ïa ka hukum ba kino kino ki samla hadien ba ki la dep ïathoh ki dei ban leit register biang sha ki Majistor.
Kawei pat ka aiñ kaba ka District Council ka la thaw ka dei ka aiñ kaba ïadei bad ka synshar khaddar ha ki shnong ki thaw, ïa kaba ka sorkar ka la tuklar bad pynduh shisyndon ïa ka bor synshar jong ki rangbah shnong, da kaba pynmih ïa ka hukum ba kino kino ki rangbah shnong, kim bit shuh ban soi ïa kino kino ki kot donkam jong ki khun shnong khun thaw kiba ka sorkar ka don kam haba ki leit wad kam wad jam, ne applai ïa kino kino ki skhim sorkar.
Watla katta ruh da ka jingïeng pyrshah jong u bah Pynshngaiñ N.Syiem kum u MDC, ha kaba u la leit ban mudui sha Ïingbishar ka District Council ka la jop bad katei ka aiñ jong ka sorkar ka la shah weng noh.
Haba phai pat sha kiwei pat ki ai kiba kham kongsan kiba ki District Council ki donkam ban ïoh ïa ka jingithuh ba pura na ka sorkar pdeng bad ban tynsat ruh ha ka riti synshar ka ri, ki dang don bun bah hynrei ki don pat katto katne kiba kham kongsan bad kiba ka jaitbynriew ka la don kam kyrkieh eh ban pyntreikam, kum ka jingpynskhem ïa ka aiñ kheiñ jait ha ka kmie (Clan Bill), ka Inner Line Permit ka ban ïada ïa ka jingwan rung kyrthlep ki bar jylla kiba long ka jingma ïa ka lawei ki khun ki ksiew pateng jong ka Jaitbynriew Khasi Jaiñtia. Ka jingithuh ïa ki pud ki sam jong ki hima Khasi bad ki shnong khappud kiba la pynrung ha ka thup kyrteng thep vote jong ki MDC Election naduh ki snem 1962.
Kitei ki dei ki bynta ba kongsan ba ka District Council ka la don kam ban pyrkhat sani bad ban ym ailad ba ka sorkar jylla kan shu ïuh roit kumba ka la leh ïa kiwei pat ki aiñ.
U la ong ba ha kane ka Election MDC ka ban sa long shen ha ka 21 tarik mynta u bnai, ki MDC kiba jop bad ki ban thaw ïa ka Executive Committee ha District Council, ki dei ban kynmaw ba ka jingangnud jong ki paitbah na ka District Council kam dei ïa ki skhim, hynrei ka dei ba ka Council kan thaw ïa ki aiñ ki ban pynskhem bad ïada ïa ka hok longtrai jong ka jaitbynriew Khasi Pnar.
U la ong ruh ba kaba sngewsih ka long ba ha kane ka Election MDC kaba mynta, ki don bun bah ki kyrtong ki bym pat sngewthuh ïa ka tynrai jong ka synshar khaddar bad ka jinglong kyrpang jong ka District Council bad haba ki ïeng ban kren ha ki rynsan ïalap elekshon, kim nang ban pynshai wat tang ïa ki kyndon jong ka Schedule.
Hynrei ki shu pynksan jubor da kaba kam ba ka party jong ki ka la wanrah ki kam pynroi ha ki shnong ki thaw, ka party jong ki ka long kaba khuid bad ka kwah ban wan rah ïa ki jingkylla khlem da lah ban pynshai kiei kita ki jingkylla.
Shuh shuh u la ong ruh ba ka District Council mynta ka la donkam ban thaw shuh shuh ïa ki aiñ kiba skhem ba kiwei pat ki aiñ kin ym lah shuh ban tuklar, la ki dei ki aiñ jong ka sorkar jylla ne jong ka sorkar pdeng ba ka jaitbynriew kan nang skhem shuh shuh ha ka jinglong trai ïa ka khyndew ka syiap, ki khlaw ki btap ki marpoh khyndew bad kiwei kiwei.
