Jowai, Jylliew 08: Kum shi bynta ka jingrakhe ia ka World Environment Day hapoh ka jingïalam jong u MDC ka Nangbah-Mihmyntdu Bah Cresentus Susngi ha madan thadmyntang Nangbah la ïashim bynta da ki nongkitkam shnong jong ka shnong Nangbah bad Mihmyntdu bad ki riewkhmat jong ka Constituency ha kaba u Bah Cresentus Susngi u long u kongsan.
U Bah Susngi haba kren ha kane ka sngi u ong, ka jingpynneh pynsah ïa ka mariang ka long kaba donkam ïa u briew ne ka briew. U ong ka meiramew ka long ka nongpynkhiah ïa u briew bad meiramew kaba dap da ki dieng, ki siej bad ki khlaw ba jyrngam ka pynlong ïa ka lyer ka bakhuid ba ki briew ki ring mynsiem, ka pynsboh ïa ka khyndew, ka pynneh pynsah ïa ki um, ki wah bad ka jaka rieh ïa ki sim, ki doh, ki mrad ki mreng kiba par kiba her.
U ong ka jingshañiah jong u briew ha ka mariang naba ka ai jingkoit jingkhiah ïa ka met bad ïa ka mynsiem jong ki briew. U Bah Susngi u la ban shuh shuh da kaba ong ba U Blei u la thaw bad saiñdur ïa ka mariang kaba itynnat ba kan pynmyntoi bad ba kan shakri ïa u khun bynriew. “Watla katta kumba ngi ïohi mynta ki briew ki la pynjot, pynjulor ïa ka mariang, ïa ki khlaw ki btab da kaba thang ïa ki lum bad ki them bad ban ïoh biang ïa ka meiramew kaba itynnat. Nga ai ha phi ïa kine ki tynrai dieng wat lada ym lah ban ai ba phin thung haduh ban da jyrngam ki lum ki them. To shim ïa kine ki tynrai dieng kat kiba nga lah ei ban ïoh bad thung shwa ha ki phyllaw ïing skul jong phi ba ki khynnah skul kin ïoh ïa ka lyer kaba khuid bad kaba long shibynta ka nongpynkoit pynkhiah ïa u briew ba lyngba ka jingdon jong ki dieng, ki siej, ki briew ki ïoh ban ring mynsiem ïa ka lyer ka bakhuid pynkut,” la bynrap u Bah Susngi.
Ha kane ka sngi la ïoh ruh ïa ka jingkren sngewnguh ïa kane ka jingkitkhia jong u ma Cresentus Susngi, Local MDC jong ki ban pynïoh tynrai dieng ban thung ha ki phyllaw ïing skul jong ki bad la pynlait ruh ïa ki symbai dohkha.
Kiba ai jingkren ha kane ka sngi ki kynthup ïa u Waheh Shnong ka Nangbah Bah Anton Yongwai, Headmisstres ka Mihmyntdu U.P. School ka Phinbha Sana, u Secretary ka Fishing Association Nangbah Shanbor Pasi bad kiwei kiwei.
Baroh ki nongkren ki la pynthikna ba kin shim ka jingkitkhlieh ha kaba sumar ïa ki tynrai dieng ba ki la thung bad kumjuh ban sumar ïa ki symbai dohkha kiba ar hajar tylli kiba la pynlait ha ka wah Myntang bad ong ruh ba kin buh ruh da ki briew kiba kyrpang ban peitngor bad lada lap ïa kino kino kiba tongjar, ber dawai ha ka jaka ba la pynlait dohkha kin shim da ka rai kaba tyngeh ïa ki nongleh dusmon.
