Khliehriat Jylliew 2025: Ka Federation of Khasi Jaiñtia & Garo People (FKJGP), East Jaiñtia Hills District ha ryngkat ka jingïatreilang bad ka Dkhiah East Secondary School Dkhiah, ha ka 5 tarik mynta u bnai kaba dei ka sngi rakhe ïa ka sngi pynneh mariang ka la thung ïa ki tynrai dieng bad pynlong ruh ïa ka jingïakob dro dur.
Ka seng ka la leh sani bha ha ka rukom thung ïa ki tynrai dieng ha kaba la ker bha ruh khnang ba ki tynrai dieng kin im bad lait na ka jingshah pynjulor.
U Additional Superintendent of Police ka East Jaiñtia Hills District Bah S.Pasleiñ haba kren kum u kongsan u la ai ka jingïaroh ïa ka FKJGP ba la lamkhmat da u President u Bah Deihok Sumer uba la pyni ïa ki kam babha ban pynneh pynsah ïa ka mariang bad ong ruh ba kane ka prokram ka pynshlur bad ai mynsiem ïa ki khynnah skul ruh ba kin don ka jingkitkhlieh ban ri bad sumar ïa ka mariang khamtam eh ba ka mariang sawdong kan long kaba lait na ka jingjakhlia plastik namar ka jingbret pathar ïa ki plastik ka buh jingma haduh katta katta ïa ka mariang bad buh jingma ruh ïa ki jingthung jingtep kiba don ha ka mariang
U Waheh Shnong ka Dkhiah East u Bah Predalin Nongtdu u la ong ba kane ka prokram ka la long ka jingmyntoi khamtam ïa ki khynnah skul ba kin sngewthuh ban ri bad sumar ïa ka mariang.
U Head Teacher jong ka Dkhiah East Secondary School u Dr. Becare-Me-O-Nongtdu u la ai jingkren halor kane ka prokram thung tynrai dieng bad ïa ka jingthung tynrai dieng la ïashim bynta lang da ki nonghikai bad ki khynnah skul
Ha kane ka sngi, la sam ruh ïa ki khusnam, ki syrnot bad ki song pisa sha ki khynnah kiba jop ha ka jingiakob dro dur ha kaba ïa ka 1st Prize lem bad ka song pisa kaba T.3000 la rah da u Elazer Lamurong, ïa ka 2nd Prize la rah da ka Angelina Dkhar, lem bad song pisa kaba T.2000, ïa ka 3rd Prize pat la rah da ka Yoowanka Salahe lem bad ka song pisa kaba T.1000.
Katba ïa ki Consolation Prize lem bad ka song pisa T.500 bad ki syrnot la rah da ka Mebanpynshai Rymbai, u Dreny Dkhar, u Rosy Nampui, ka Wandakaru Lapasam bad ka Sambhaki Lamurong.
