Ïaid paidbah ka MARODA bad Green Tech ban pynsngewthuh ïa ka jingdonkam ban leh khuid

Shillong, Jylliew 08: Ka Motphran Auto Rickshaw Owners and Drivers Association ha ka jingïatreilang bad ka Green Tech Foundation East Khasi Hills district ki la pynlong ïa ka jingïaid paidbah ban pynsngewthuh ïa ki nongshong shnong ha kaba ïadei bad ka jingdonkam ban long kiba leh khuid bad ban pynneh pynsah ïa ka sawdong sawkun. Ïa kane ka jingïaid paidbah la sdang na Mawlai Phudmuri ka stand ki Auto Rickshaw ha kaba ki dkhot ka MARODA bad Green Tech ki la ïaid da ka kjat ha ryngkat lang bad ki jingrwai phawar ka tem ksing ba kyntu ïa ki paidbah nongshong shnong ba kim dei ban bret ñuit pathar ha ki lynti syngkien bad lynti shnong. Katba ki dang ïaid paidbah ki dkhot ka MARODA bad Green Tech kiba la rah lang ïa ki khoh bad ki placard ki la tam artat ha lynti ïa ki jaboh jabaiñ bad ki ñuit ki ñier.
La pynkut ïa kane ka prokram da ka jingïalang ba lyngkot ha stand Auto Rickshaw ha Motphran ha kaba ki nongïalam shnong ba kynthup ïa u Bah Tribalget Dkhar Rangbah Shnong ka Dorbar Shnong Umsohsun, nangta u Rangbah Shnong ka Mission Compound u Bah Tomleymoori Rumnong bad u Assistant Rangbah Shnong ka Dorbar Shnong Mawkhar Bah Keith Basaïawmoit ki la ai jingkren bad la ïoh ruh ka jingkren na u Chairman ka Green Tech Bah H Bansiewdor Nonglang.Ha kane ka prokram la pynkupburom ïa ki nongïalam shnong, la sam ruh ïa ki tynrai dieng sha ki 3 tylli ki Shnong bad na ka liang ka Green Tech ka la plie paidbah ruh ïa ka Shillong Clean and Green mission kaba la sdang naduh ka Sngi Saitjaiñ da ka jingthmu ban pynkhuid ïa ka Shillong kaba dei ban sdang nalade shimet bad kane ka Mission kan kut ha u snem 2035.
La pynïaid ïa ka jingïalang da u President MARODA u Bah Evandul Marbaniang. Ha ka jingïalang la ïakren sani bha halor ka jingdonkam ban long kiba lehkhuid khamtam eh ha ki jaka paidbah kum ka Motphran, nangta ka jingdonkam ban pynkhuid ïa ka Wah Umkhrah, ka Wah Umsohsun.Na ka liang u Chairman ka Green Tech haba pyllait paidbah ïa ka Shillong Clean and Green Mission u la pynpaw ïa ka jingangnud ba yn lah ban pynkhuid ïa ka nongbah Shillong la kumno kumno hapoh u snem 2035 da ka jingthmu ruh ban hikai ïa ki paidbah ban sdang ïa ka jingleh khuid jingleh suba kaba dei ban sdang shwa nalade. U la ïaroh ruh ïa ka MARODA kaba la shim ïa kane ka sienjam kaba dei kawei na ki seng kaba nyngkong eh ban pynlong ïa kane ka prokram namar ba ki sngewthuh ba kane ka jaka ïeng kali Auto kadei ka pliang ja jong ki kaba ki im bad kamai jakpoh manla ka sngi.
Ha kane ka sngi la sakhi ruh da ka jingïadonlang na ka tnat State Pullution Control Board ka sorkar jylla bad kiwei kiwei.