Shillong, 13 Lber: Ha ka Dorbar mang tyngka jong ka KHADC kaba la kut noh ha ka sngi Balang na ka liang u EM ba peit ïa ka tnat Elaka ka KHADC bad uba dei ruh u Symbud CEM u Bah P N Syiem u la ong ba halor ka jingïapynbeit pud ha ka wat kaba ar yn shim beit katkum ka jingdon ki dulir ne ki jingshisha halor ka khana pateng (Historical Facts) bad ïa kane yn ïakren ruh hapoh ka Regional Committee bad ka EC kan sa khot pan jingmut la jong baroh ki MDC.
Ïa kane u Bah Syiem u la jubab ïa ka jingkylli ba la wanrah da u MDC ka Mawthadraishan u Bah Jambor War uba la pan ïa ka jingheh ki jaka jong ki 5 tylli ki jaka kiba ïapher halor u pud u sam ka Meghalaya bad Assam kiba hab hapoh ka Khasi Hills ban pynbeit ha ka wat kaba ar.
U Bah Jambor u la ong ruh ba ka KHADC kan dei ban don da ki dulir ban pynshisha ïa ki jaka khnang ba kan ym jia shuh kumba la jia ha ka wat kaba nyngkong.
Haba ïashim bynta lang ha ka kynta jingkylli u MDC ka Sohra uba dei u Nongïalam ka Liang Ïatei u Bah Titosstarwell Chyne u la kylli ïa ka bynta ka Council halor ka jingpynbeit pud ha ka wat kaba ar bad u la ong ba ïoh ka jia kumba la long ha ka Phase 1 kumta shwa ban ïasoi MOU dei ban ïoh ka jingshaniah jong ka KHADC bad kan dei ban long kaba ïahun lang da baroh.
Halor kane u EM u la ong ba ha shwa ban leit sha ka Phase 2 yn ïaid lyngba ki Raid ki Hima ïa ki shnong kiba hab hapoh ka Council.
“Nalor ki dulir bad ki kot ki sla kiba la pynskhem da ki Raid ki Hima kita hi ki la long kiba pynshisha,” ong u EM.
Na ka liang u EM u la ïathuh ba ki 5 tylli ki jaka ba don jingïapher ne ïakajia pud kidei ka Langpih Area ha West Khasi Hills kaba ka jingheh 298.07 malu mala ha ka Sq.Km.
Nangta ka Borduar Area Ri Bhoi District kaba don 147.83 Sq.Km, ka Nongwah-Mawtamur Area Ri Bhoi District kaba don 137.51 Sq.Km, ka Desh Doomreah Area ha Ri Bhoi District kaba don 484.72 Sq.Km bad ka Block -II area ha Ri Bhoi District kaba don 1,009.88 Sq.Km bad ka jingheh jong baroh ki jaka haba kheiñ lang ka la long 2078.01 Area Sq. Km.
Na ka liang u EM u la ong ruh ba ka KHADC ka la shah kynthup lang hapoh ka Regional Committee bad ka don bynta bad ka MOU ba ïasoi hapdeng ki arjylla bad ki jingshisha katkum ki khana bad ki dulir dei ka bynta jong ka KHADC ha kaba ïa kane yn ïakren hapoh ka Regional Committee.
