Shillong, March 16 : Kadei ka sien kaba nyngkong eh ba ka nongbah Shillong kan pdiang ïa ka kynhun ïalehkai bar-ri ban wan ïakhun pyrshah ïa ka kynhun ïalehkai jong ka Ri ha madan JN Stadium Polo kaba la buh ban long ha ka 19tarik mynta u bnai ha ka por 7:00 baje janmiet.
Ïa ka kynhun ïalehkai jong ka Maldives kaba poi hynne ka sngi ha nongbah Shillong la pdiang burom da ki nongïalam jong ka Meghalaya Football Association hapoh ka jingïalam jong u Bah Cliff Nongrum ba dei Vice President ka MFA ryngkat ka jingdonlang ki dkhot ha Hotel Vivanta, Khyndailad .
Ka Maldives kan ïakhun pyrshah ïa ka kynhun ïalehkai ka India ha ka 19tarik mynta u bnai ha ka por 7:00 baje janmiet ha madan JN Stadium Polo. Kane kan dei ruh ka jingïakhun pynkhreh ïa ka India ha shwa ba kan aireng pyrshah ïa ka Bangladesh pat ha ka 25tarik na bynta ka jingïakhun knieh rung sha ka AFC Asian Cup 2027.
La khmih lynti ba kane ka jingwan ki lympung ïalehkai barri ha nongbah Shillong kan pynshongshit ïa ki paid ieit phutbol ka Meghalaya ban wan kyrshan ïa ka kynhun ïalehkai ka India kumba ki la pynshongshit naduh ka Durand Cup, nangta ha ka lympung ïalehkai jong ka Indian Super League.
Kane ka kynhun ka la poi hynne ka sngi lyngba ka kad liengsuin ha Umroi.
Lah ban kdew hangne ba ka kynhun ïalehkai ka India hapoh ka jingïalam jong u Sunil Chhetri ki la poi ha nongbah Shillong ha ka sngi Saitjaiñ bad kum ka kynhun kan ka la ïoh ruh ban kilan met ha nongbah Shillong.
