Ha ka sien kaba nyngkong, ïoh ka Patharkhmah Civil Sub Division ban rakhe ïa ka sngi ïoh jylla ka Meghalaya

Nongpoh, Kyllalyngkot 21: Ka long ka jingkmen bad ka jingsngewsarong ïa ki paidbah ka Patharkhmah Civil Sub Division ha Ri Bhoi District, ha kaba mynta ka sngi ha ka sien kaba nyngkong ka la ioh ban rakhe ïa ka sngi ioh jylla ka Meghalaya lane ka sngi ba ka Meghalaya ka la kynnjoh sha ka jingïaid lynti ba 51 snem naduh ba la ioh la ka jong ka jylla Meghalaya hadien ba ka sorkar jylla dang shen ka kyntiew noh ïa ka Patharkhmah Administrative Unit sha ka Civil Sub Division.
Ïa kane ka jingrakhe ïa ka jingdap 51 snem ka jylla Meghalaya (Meghalaya Day) la rakhe ha phylla ka ophis u Block Development Officer ka Jirang C&RD Block, ha kaba u Bah M.B Tongper, Sub Divisional Officer ka Patharkhmah Civil Sub Division u la shim bynta kum u kongsan ban rakhe ïa kane ka sngi kyrpang ka Meghalaya ryngkat ki paidbah ka thaiñ Patharkhmah Civil Sub Division ha Ri Bhoi District.
Haba rakhe ïa kane ka jingïaid lynti ka jylla Meghalaya sha u mawmer ba 51 snem, la don ryngkat ruh u Block Development Officer ka Jirang C&RD Block, u Dr. P.R Hajong, ki ophisar na ki tnad treikam bapher bapher, ki SHG bad kynthup ruh ki nongïalam Shnong bad ki riew paidbah ka thaiñ Patharkhmah-Jirang.
Ha kane ka sngi, kum ka jingpynshlur ïa ki kynhun SHG ba hap ha ka Patharkhmah Civil Sub Division, la pynshlur ruh ïa ki kynhun SHG ban pyninam naduh ki mar rep, ki jaiñ tynrai, ki bam tynrai bad kiwei kiwei ki jingshna kti kaba long shi bynta ruh ban ailad na ka bynta ban pynïaid iew ïa ki mar jongki, kaba long ka jingkyntiew ïa ka ioh ka kot jong ki kynhun SHG.
Haba kren ha kane ka sngi kum u Kongsan, u Bah M.B Tongper, Sub Divisional Officer ka Patharkhmah Civil Sub Division, u la pynpaw ka jingkmen kaba khraw ba ha ka sien kaba nyngkong hadien ba la ioh ïa ka kyrdan Civil Sub Division ki paidbah ki la ioh lad ban rakhe ïa kane ka sngi kyrpang jong ka jylla ba ka jylla ka la ioh la ka jong ka jylla kaba ïaid lynti sha ka 51 snem naduh ba la ioh jylla ha ka 21 tarik u Kyllalyngkot 1972.
Kum u ophisar rangbah ba dei peit ïa katei ka Civil Sub Division ha Ri Bhoi, u Bah Tongper u la khot la wer ïa ki paidbah nongshong shnong ban ai ka jingkyrshan ïa ka sorkar jylla na ka bynta ban pyntreikam ïa ki kam pynroi bapher bapher bad dei lyngba ka jingïatrei lang ki paidbah ka sorkar kan dang lah shuh shuh ban kyntiew ïa katei ka dong bad ka thain ha ka liang ka roi ka par, ka ioh ka kot bad ka longbriew ka manbriew.
Shuh shuh, u la kham ban khia ruh ba na ka liang ka sorkar bad ki ophisar na ka Civil Sub Division ryngkat ki paidbah ki hap ban don ka jingïatrei lang na ka bynta ban phai khmat ne ban kham ban khia ban kyntiew naduh ka kam rep ka kam riang, ka kam ïalehkai sport, ka kam jngohkai pyrthei bad ruh ka jingnang jingstad bad lada ngi lah ban kyntiew tang ïa kitei ki bynta ka dong bad ka thaiñ Patharkhmah ha Jirang kan dang kiew irat ha baroh ki liang jong ka longbriew ka man briew, u la bynrap.