Khliehriat, K’Lyngkot 21: U District Magistrate ka East Jaiñtia Hills District, u Abhilash Banarwal, IAS, u la pynbna ba la pyntreikam mardor ïa ka aiñ 144CrPC hapoh ka district, ha kajuh ka por la buh ruh ïa ki jingmana khnang ban pynneh pynsah ïa ka suk ka saiñ hapoh ka district khamtam ha kum kane ka por ba ka jylla ka dang pynkhreh shaid shaid ïa ka election jong ka Meghalaya Legeslative Assembly 2023, ki kyndon ki jingmana ki dei kiba ïaid ryngkat bad ka Model Code of Conduct.
Katkum ka hukum, la mana pyrshah ban thoh kino kino ki jingthoh, ban tah kino kino ki poster ne ki baner bad ban pynpaw (display) ïa kiei kiei ki ba pynjah burom lane kren pyrshah ïa kiwei, la mana ruh ban buh ïa ki baner, ban sieh ïa ki lama ha ki jaka sorkar. La mana ruh ban thoh ha ki kynroh, ban sieh lama bad buh ïa ki baner ha ki jaka jong ki briew shimet lada khlem da ïoh jingbit na ki trai.
La mana ruh ban sieh ki lama bad ban tah ïa ki stiker ha ki kali shimet, laitnoh sa tang lada ki trai kali ki mon hi ban leh, tangba kam dei pat ban wanrah kano kano ka kynrum kynram ka ban ktah ïa ki paidbah nongleit nongwan, kumjuh ruh la mana ban tah ki stiker, ban sieh ki lama ha ki kali kamai bad yn shah tang ïa kito ki kali kiba pyndonkam shisha na ka bynta ka jingïalap election kiba la ïoh jingbit na ka ophis jong u District Election Officer lane na u Returning Officer bad hap ban tah ïa ka kot ba ïoh jingbit ha ka iït kali (wind shield).
Katkum ka hukum, la mana ruh ban rah ïa kino kino ki tiar pynmynsaw bad kino kino ki tiar pynbthei ha baroh kawei ka district tat haduh ban da dep ka election bad kane ka bynta jong ka hukum kan nym treikam ïa ki briew ka aiñ ba pahara (Force) kum ki pulit, ki Home Guard, ki pulit ka tnat khlaw (Forest Personnel), ki shipai BSF bad ki CMPF personnel.
La ong ba kane ka hukum ka treikam mardor ha baroh kawei ka East Jaiñtia Hills District tat haduh ban da pynbna da kumwei pat.
Ka kang HML Kynta, MCS ADM ha ka jingkren kala ai ka jongbatai halor ka jingïoh laidluid ka jylla Meghalaya, da kaba ong ba kane ka sngi ka long kaba kyrpang ïa ki khlawait ka ri kiba ïakhun ban pynïoh ïa ka jylla ba para, kala pynsngew ruh ïaki kam bala synñiang da ki nongshong shnong naduh ki nongïakhun laidluid, ki riew shemphang, ki nongrep, nongpynwan dur, ki nongtrei sorkar bad ïa baroh kiba la ïarap ban kyntiew kynrong ïa la jylla hi baroh kawei.
Kala ong ruh mynta ka dei ka sngi sah jingkynmaw ïa baroh lang ki nongshong shnong namar ka jingïatylli lang kawei ban pynlong ïa ka jylla kum kawei na ki jylla kaba paw bha ha baroh ki liang.
