Nongpoh, Lber 31: Da ka jingtwet ba jur bad da ka jingbuddien ki Pulit ka East Guwahati Police District na Dispur Police Station halor ka jingshah tuh kawei ka Trok kaba don ïa u Number AS13AC5614 na ka jaka ba pynïeng hajan ka Sai Baba Mandir ka la pynpulom noh ïa ki runar kiba don kti ha kane ka kam, kaba dei hadien ba ki Pulit ka Dispur ha ka miet jong ka sngi Saitjaiñ ki la ïoh ban bat ïa kawei ka Kali kaba ki pyndonkam ha ki kam tuh na Basistha, Assam.
Katkum ka khubor ba la ïoh lum, la ong ba ki Pulit ka Dispur ki la ïoh ksai halor kane ka kam tuh da kaba ki la pynlong shwa ïa ka jingkhynra ha kawei ka jaka ha 13 mer ba hap ha u pud u sam ka Meghalaya bad lyngba kane ka jingleit khynra la lap ïa kane ka Trok ba ki runar ki la tuh ryngkat ka Engine ba ki la dep ban loit na katei ka trok kaba ki la pynkit pat ha kawei ka trok kaba don ïa u number HR-58B-7366.
La ong ruh hadien ka jingïoh kurup ïa katei ka trok kaba ki pyndonkam ban kit ïa ka Engine jong katei ka trok ba ki la tuh, da ka jingthwet jur ki pulit ka Dispur la ïoh ruh ba kem ïa ki 8 ngut ki runar kiba don kti ha kaba rah tuh ïa katei ka Trok na ka jaka ba pynïeng bad ban tuh ïa ka engine jong katei ka Trok ryngkat kiwei ki tiar kiba ki la dep ban loit na katei ka trok kaba ki la ïoh ban rong tuh.
Kine ki snar nongtuh trok ba la ïoh ba kem da ki Pulit ka Dispur na ki jaka bapher bapher ha ka jingtohkit ki kynthup ïa u Md. Rashidul Alom na Nalbari, U Noor Hussain na Satgaon, u Maidul Islam na Mukalmuwa, u Ainul Haque na Hajo, u Nazrul Islam na Bongaigaon, u Pankaj Yadav, na Lalmati, u Sanjib Kumar na Haryana bad u Ranbir Arora na Haryana.
Shuh shuh, la ong ruh hadien ba la ïoh ban kem ïa kitei ki runar, ki Pulit ka Dispur ki la leh katum ki kyndon jong ka aiñ bad ka jingtohkit halor kane kam tuh ka dang ïaid shaphrang.
Halor kane ka kam tuh ïa katei ka trok da kitei ki snar nongtuh, la pynthikna ruh da u heh Pulit ka Ri Bhoi, ba ki Pulit ka Assam na Dispur ha ka jingkhynra ïa kitei ki kam tuh la pyntip ruh sha ki bor pulit ka Ri Bhoi lyngba ka Byrnihat Police Station.
