Jowai, Naiwieng 03: Ka kong Wa I Sa Sumer kawei na ki longkmie kaba shong basah ha Nongbah Jowai haka dong Panaliar, ka lok u ma O.R. Shallam ka la ïoh ïa ka kyrdan Ph.D naka skul bah William Carey University, Shillong hadien ka jingpyndep jong ka ïa ka jingpule bniah halor ka Thesis “The Impact of Jaiñtia Hills Autonomous District Council on Elaka Administration: A study of Raliang and Jowai Elaka” hapoh ka jingkhmih (Examiners) jong u Prof. Govin Kumar, JNU, New Delhi bad Prof. L.S Gassah retired Professor NEHU
La ïathuh ba ka kong Wa I Sa Sumer ka la kynjop mynta sha ka rta kaba 55 snem bad ka dei ruh ka nonghikai Political Science haka Govt. Girls Higher Secondary School Jowai, ka don San ngut ki khun, saw ngut ki shynrang bad kawei ka kynthei. U kpa jong ka u dei u Dr. Bhom Sing Challam bad ka kong Sidina Sumer.
Ka jingïoh jong ka kong Wa I Sa Sumer ïa kane ka kyrdan kum ka longkmie ka la long shisha ka jingai mynsiem ïa kiwei de, khamtam ïa ki khun samla ba kin don ka thong ban pyndep ïa ki jingwad bniah jong ki shaphang ka jingpule Ph.D.
Halor kane ka jingjop jong ka na ka liang jong ka skul ruh kaba ai mynsiem ïa ka kong Wa I Sa Sumer da ka ai ruh ïa ka momento kum ka dak ban sah jingkynmaw, ha ka juh ka por ka kong Wa I Sa Sumerka ka long ruh ka longkmie kaba kit ba bah lang ïa ki kam jong ka Seng longkmie ha ka Seiñ Raij Jowai kumjuh ruh haka shnong ka thaw.
Shuh shuh kane ka jingïoh ïa ka kyrdan Ph.D ka la wanrah burom ïa ka ïing ka sem bad kumjuh ïa ka shnong ka thaw hi baroh kawei.
