Shillong, Nailur 26 : U Myntri Khynnah ka Minority Affairs u John Birla mynta ka sngi Ba-ar, ula ïasnohkti lang ha ka Rozgar Mela ha Shillong bad sam ïa ki shithi thung kam sha ki samla ba dang ïoh kam thymmai hadien ka jingkren u Myntri Rangbah Duh ka Ri.
U Myntri Rangbah Duh Narendra Modi ula kren ha ka Rozgar Mela bad sam haduh 51,000 tylli ki shithi thung kam sha ki samla ba dang ïohkam thymmai lyngba ka video conferencing mynta ka sngi Ba-ar.
Ha Shillong, ïa ka shithi thungkam la aiti sha palat 293 ngut ki samla kiba dei jong ka Tnad Department of Post, Food Corporation of India, Ministry of Health & Family Welfare, North Eastern Electric Power Corporation Limited, Ministry of Education bad Ministry of Defence.
Napdeng kine, 126 ngut ki samla ki la ïoh pdiang ïa ka shithi thungkam hynne ka sngi ha Meghalaya.
U Myntri Khynnah haba pynpaw ïa ka jingkmen halor ka jinglah pynlong ïa ka Razgar Mela kaba jop, ula ong “ Ka pynkmen shibun ïa nga ban don lang hangne bad don bynta lang ha ka Rozgar Mela u Myntri Rangbah Duh kaba la pynlong ha ki 46 tylli ki Centre ha kylleng ki Jylla ka Ri”.
Haba pynkynmaw ïa ka thong jong u Myntri Rangbah Duh ban ai kam ai jam sha ki samla da ka pali pali, u Birla ula ong “Ha u Jylliew 2022, u Myntri Rangbah Duh ula shong bishar ïa ka jingdon ki nongtrei ha baroh ki Tnad bad Ministry bad ula ai jingbthah ban thungkam haduh 10 lak ngut ki briew da ka Sorkar lyngba ka mission mode ha kine ki shisnem shiteng ban wan”.
Haba ïakren bad ki nongthoh khubor, u Birla ula ong ba ka Sorkar hapoh ka jingïalam u Myntri Rangbah Duh ka la skhem jingmut halor ka nongrim jong ka ‘Sabka Saath, Sabka Vikas, Sabka Vishwas, Sabka Prayass” ban tei ïa ka Aatmanirbhar Bharat.
U ong ba ka Sorkar kala trei shitom ban pynthikna ba baroh ki Nongshong shnong ka Ri ki dei ban ïoh lut ïa baroh ki jingdonkam ba kongsan ha ka jingim lyngba ki prokram bad ki skhim bapher bapher khamtam lei ïa ki longïing kiba duk ba suk ha ka imlang sahlang.
U Myntri ula mynjur ruh ba bun ki briew ki la duh ïa shibun ki skhim ka Sorkar Pdeng namar ka jingduna ka jingtip shaphang kine ki skhim. Namar kata, ula kyrpad ïa baroh ha ka ban pyntip lem sha ki paidbah ïa ki skhim ka Sorkar khnang ban lah pyntreikam bha ïa ki skhim bad ki policy ka Sorkar.
Kawei na ki samla ba dang shu ïoh kam ka samla Audrey Liza Malngiang na Shillong, haba pynpaw ïa ka jingsngewnguh ka la ong “Ka dei ka jingkyrkhu bad sngew burom ba nga ïoh ïa ka lad ban long shibynta jong ka Rozgar Mela bad nga kwah ban ai khublei ïa u Myntri Rangbah Duh uba la ailad ïa nga ban trei na ka bynta ka Sorkar India”.
Ka samla Audrey ka la ïoh ïa ka shithi thungkam hynne ka sngi hapoh ka Tnad Department of Post kum ka Gramin Dak Sevak- Assistant Branch Postmaster.
