Ha ka juk ba bun ki nongshim kabu donkam ïa ki paidbah ban husiar ha baroh ki liang

Shillong, Risaw 19 : Ka Dorbar Shnong Nongkseh ha ka sngi Thohdieng ka la pynlong da ka jingpynshai paidbah halor ka hok kaba kum ki paidbah kum ki nongbam, nongthied nongthied ba ki dei ban tip khamtam ha kum kane ka juk mynta.
Ha kane ka sngi ki paidbah ki la ïoh ïa ka jingpynshai kaba bniah na u Additional Deputy Commissioner ka East Khasi Hills Bah PT Passah kum u Kongsan uba la batai bniah bha kumno ban da peit bniah haba thied ba pet ïa ki marbam
Katkum ka jingong jong u, ki paidbah ki dei ban da peit bniah thik pa thik haba ïadei bad ki mar bam khamtam eh haba ki thied ïa ki marbam jong ki khunlung namar ki kompeni ki la da kdew lut la ka long naduh ka tarik ba shna, ka por kaba dang long ba pyndonkam, ïa ka dor bad bun kiwei kiwei.
U Kongsan u la ong ruh ba ki paidbah ki don ruh ïa ka hok ban ujor sha ki bor ba halor kynthup sha ki bor sorkar haba ki kynduh ïa kino kino ki jingshah thok ne shah shimkabu. “Ki paidbah nongpyndonkam ki don ïa ka hok ban ïoh ïa ki mar kiba bha bad lada dei ka bam ki dei ban long kiba wanrah ïa ka koit ka khiah jong ki,” u la ong. Nangta na ka liang u BDO ka Mylliem Bah Toshan Marwein u la ong ba ha kane ka juk bun kiban shim kabu lada ki paidbah kim tip ïa ki lad ban ïada na ka jingshah thok.
Une u ophisar u la batai ruh ba bunsien ki ju don ki riewshim kabu kiba kam ïalade ba ki dei na ki bank bad kane ka pynlong ïa ki paidbah ban shah ïalam bakla. Kumta ha kum kine ki jingjia, u kyntu ïa ki paidbah ba kidei ban long kiba husiar ban ym ngop ha kine ki jingshah pynbiej.
Katba na ka Assistant Commissioner ka Food and Safety Kong DBS Mukhim ka la ong ba ha ka jingïaid kylleng ban buddien halor ka khuid ka suba ïa ki bam ki dih ba dei bad ki paidbah ka la lap ruh bun kiei kiei kiba teng teng kim lah ban pdiang.
Na ka liang u Bah Shullai, Sub Inspector na ka tnad Food and Civil Supply u la pynshai haba ïadei bad u khaw rashon bad ruh halor ka jingdonkam ban pynïasoh ïa u Aadhar bad ki card khaw rashon.
Na ka liang u Bah Kyrsoi Mylliemumlong na ka Legal Metrology u la ïathuh ba lada don kiba ujor ba ka don ka jingthew ruh ne leh thok por ba thew kim ju pynslem ban tuklar bad pynshitom ruh lada lap.
Ha kane ka sngi la wan ban shim bynta da ki spah ngut ki nongshong shnong nalor ka jingdonlang u Rangbah Shnong bad Secretary Shnong, Genral Secretary ka Nongkseh Sports Club, Bah Daniel Thangkhiew bad kiwei kiwei.