Shillong, Lber 25 : U Myntri Rangbah ka Jylla u Conrad K Sangma ula pynpaw ïa ka jingdonkam ban don da ki policy treikam ba kyrpang ha man la ki Jylla na ka bynta ka Act East Policy bad ong ba ka policy ba kumjuh (uniform) kan ym biang satia na ka bynta ki Jylla ka thaiñ Shatei Lam Mihngi kiba ïapher kawei na kawei pat.
Haba plie ïa ka 7th Act East Business Show kaba sdang hynne ka sngi ha Shillong, u Conrad ula tyrwa ba man ki Jylla ki dei ban pynleit jingmut ha kino ki kam ba ki kwah bad ka jingïatreilang bad ki ri ba marjan kaba ïaid kat kum ka jinglong ki jaka bad ka jingkhlaiñ ha ka ïoh ka kot.
“Ka jingdon ka Meghalaya ïa ka bynta khappud ba jrong bad ka Bangladesh ka plie lad plie lynti bha ïa ka jingïatreilang na shiliang sha shiliang khappud, katba kiwei ki Jylla ki lah ban don ka jingïadei kaba khlaiñ bad ka Myanmar lane kiwei ki ri ka South East Asia. Ki buit treikam kiba da pynwandur bha kan ai ïa shibun bah ki jingmyntoi” ula batai.
ïa kane ka business show la pynlong da ka Indian Chamber of Commerce ha ka jingïatreilang bad ka Sorkar Meghalaya, da ka jingthmu ban pynkhlaiñ ïa ka jingïadei bad ki Ri BBIN bad ASEAN.
Kane ka business show kaba khring ïa ka jingwan ïashimbynta ki Heh Sorkar na ki Ri ASEAN, ki nongsengkam, ki nongrahktien syiem bad kiwei kiwei, ka pynleit jingmut hakhmat eh ha ka liang ka jingïatreilang ban kyntiew ïa ka ïoh ka kot, ka lad ban sengkam sengjam bad ka jingwanrah ïa ka roi ka par kaba neh slem hapoh ka thaiñ Shatei Lam Mihngi.
U Conrad ula ban jur ïa ka jingkongsan ban don ka jingïatehlok kaba bun bun snem. “Ha ngi, kum ka Jylla bad kum ka Ri, ka jingtei ïa ka jingïadei kaba khlaiñ ka dei u shabi. Ki jingïalang kum kine ki lah ban wan bad leit, hynrei ka jingïadei, ka jingïalong paralok bad ka jingïasngewthuh markylliang kaba mih na ki, kin ïai neh bad ban rah lang sha la ki jong ki jaka” ula ong.
U Myntri Rangbah ula kren ruh halor ka jingkiew sted bha ka ïoh ka kot ka Jylla Meghalaya ha kaba ka GDP kala kiew haduh 13.5% ha kine ki snem bala leit, kaba tam ïa ka national average. Ula ainam ïa kane ka jingjop sha ki policy kiba da buh thong, ka jingdon ïa ki nongïalam kiba kut jingmut ha Jylla bad ha ka Sorkar Pdeng. “Ka jingkiew shaphrang ka wan bad ka lynti treikam, ka policy bad ki sienjam ba ngi shim. Ngi dei ban phohsniew ïa kaba heh bad buh ïa ka thong ban bteng ïa kane ka jingkiew irat” ong u Conrad.
U Ambassaor ka Germany sha India u Philipp Friedrich Johannes Ackermann ula kren halor ka jingthrang jong ki kompani na Germany ban wan sha India khamtam ha ka thaiñ Shatei Lam Mihngi.
“Mynta u snem, 59% na ki 2000 tylli ki kompani na Germany ki don ïa ka jingthmu ban seng kam thymmai ha India” ula ong.
Une u Ambassaor ula ïathuh ïa ka kam rep khlem dawai (organic farming), jingpynmih jingbam, ka kam jngohkai kaba neh shirta, ka skill development ba ki dei ki kam kiba biang eh ïa ki nongseng kam na Germany ha Meghalaya.
