Shillong, Rymphang 23 : U MLA ka Congress na Gambegre, Saleng A Sangma ha ka sngi Thohdieng u la ong ba watla ki pulit ki trei borbah ban pyndep ïa ka kamram hynrei don ki jaka sah (quarter) ki bym long satia ban wah lang bad ki bahaiing ha sem.
Haba rah ïa kane ka mat hapoh Iing Dorbar, utei u MLA u la ong ruh ba ki don ki jaka kiba long kum ki trep. “Ïa kiba kum kine lada lah ban maramot lane ban pynbha,” u la ong.
Haba jubab halor kane ka mat hapoh Iing Dorbar, u Symbud Myntri Rangbah ka jylla, Bah Prestone Tynsong u la ong ba ka sorkar ka la mang 50 lak na bynta baroh ki distrik na ka bynta ban maramot ïa ki jingtei kiba dei ki quarter ne barrack jong ki pulit.
“Ngi dang peit ïa ki jingtei kiba la julor bad ha kane ka snem mangtyngka, ka sorkar jylla ka la mang 50 lak tyngka na ka bynta man ka distrik ban pynbiang ïa kitei ki jingdonkam,” u la ong.
Nalorkata, u ong ruh ba u kular ha Iing Dorbar ba kin pynkhlaiñ bad pyntikna ba ka jaka sah jong ki pulit kan long kaba i kob.
Shuh shuh u la ong ruh ba ha kane ka snem ki la don bun ki jingpynbha ha ka tnad pulit. “Hadien ba la dep ban peit bad ïohi ba la donkam ban leh, ngi la thaw la ka jong ka engineering wing, kaba la treikam mynta shaid shaid,” u la ong.
