Ba wanrah u MLA ha Iing Dorbar, kular u CM ban peit bniah hi dalade halor ki karkhana coke
Shillong, Rymphang 23 : U Myntri Rangbah ka jylla, Conrad K Sangma ha ka sngi Thohdieng u la kular ba un bishar bniah hi dalade ïa ki aplikeshon jong ki san tylli ki karkhana coke kiba la ïoh ïa ka jingbit da ka Meghalaya State Pollution Control Board (MSPCB) bad ong ba un leh da ka kam lada lap ba la pynkheiñ ïa ki kyndon.
Hynrei, u la ong pat ba kan long kaba bakla lada ong ba ki karkhana coke lane ki karkhana ba kim long, naba ka jylla ka donkam na bynta ka jingkiew ha ka ïoh ka kot da kaba wanrah ïa kum kine nalor ba ki ai kam ai jam ïa ki paidbah.
Kane ka jingkren jong u Myntri Rangbah kadei halor ka zero hour notice ba la wanrah da u MLA ka UDP na Mookaïaw, u Bah Nujorki Sungoh ha kane ka sngi Thohdieng ha Iing Dorbar Thawaiñ ka jylla.
Shwa kane, u Bah Nujorki u la pynpaw ka jinglyngoh halor ka rai jong ka MSPCB ban ai jingbit thymmai (CTE) sha ki san tylli ki karkhana coke ha East Jaintia. U kynnoh ba kham mynshwa, kajuh ka MSPCB ka la kyntait ïa ka aplikeshon jong ki lai tylli na ki san tylli ki karkhana coke da kaba ong ba ka jaka kam ïahap.
Da kaba kdew ruh ïa ka jingktah jong kitei ki karkhana ïa ka mariang, u Bah Nujorki u la ong, “Khlem lyngoh, ngi la shah ñiew kum ka nongbah ba jur bampong (cancer capital).”
Na ka liang u Myntri Rangbah haba jubab shuh shuh u la ïathuh ba ki don ki kyndon kiba hap ban bud bad kam don satia ka jingkylli mano ba pynkheiñ ïa ki kyndon, hynrei lada ki leh pat kumta, yn hap ban leh katkum ba shah ka kam bad katkum ki kyndon jong ka aiñ.
“Nga kular ha u dkhot ka Iing ba ïa kane ka phang, kaba dei ka nga sngewtynnad eh ba ngan sa peit hi ïa kine ki ishu bad ngan sa peit bniah ïa kawei pa kawei ka aplikeshon dalade bad ban wad kiei ki kyndon. Ngan sa khot ruh ïa ka jingïalang bad ka MSPCB bad ngan sa pyntip ïaphi halor kane,” u la ong.
Tangba u ong pat ba lada ki kyndon ki biang kin ym lah ban khanglad ïano ïano ba kin leh ïa ki kam khaïi jong ki hynrei lada lap pat ba la pynkheiñ ïa ki kyndon, kin sa leh kumba shah ka kam.
Nalorkata u ong pat ba um ïahap satia ba tang ba don ki karkhana yn shah kynnoh noh ba dei ka nongbah bampong ha ka ri. Katkum ka jingong jong u, ki don bun ki kam kiba dei ha lyndet ka jingbun kiba pang bampong ha ka jylla.