Ha Delhi yn ïakhih ka HANM ban urlong ka jingdawa ILP bad ka Ktien Khasi
![](https://mawphor.com/wp-content/uploads/2022/05/mawphor-1.jpg)
Shillong, Risaw, 12: Ka Hynñiewtrep Achik National Movement (HANM) ka la rai ban pynlong da ka jingïakhih ha Jantar Mantar, Delhi ha ka 3 tarik, Naiwieng, 2023 ban pynsngew sha ki tyndong skhor jong ka Sorkar Pdeng ïa ki mat jingdawa kiba dang sahteng haduh mynta.
Ka Inner Line Permit (ILP), ka jingdawa ban pynrung ïa ka Ktien Khasi bad Garo ha ka Khyrnit Baphra jong ka Riti Synshar ka Ri India ki dei ki mat kiba ka Ingdorbar Thawaiñ jong ka Jylla ka la mynjur hapoh ka Ingdorbar Thawaiñ.
U President ka HANM Bah Lamphrang Kharbani ha ka jingïakren bad ki lad pathai khubor u la ong ba ka Sorkar Pdeng kam shym la shimkhia ïa kaei kaba ka Iingdorbar Thawaiñ ka jylla Meghalaya ka la mynjur halor ki ar tylli mat kaba ki paidbah ka jylla ki la dawa la bun bun phew snem.
Ka Iingdorbar Thawaiñ jong ka Jylla ka la shim ïa ka rai ha ka 27 tarik, Nailur 2018 ban dawa na ka Sorkar Pdeng ban pynrung ïa ka ktien Khasi bad Garo ha ka Khyrnit Baphra jong ka Riti Synshar ka Ri India bad ha ka 19 tarik, Nohprah 2019 ka la shim sa ïa ka rai ban pyntreikam ïa ka Bengal Eastern Frontier Regulation Act 1873 hapoh ka jylla.
Haduh mynta ka Sorkar Pdeng kam pat pdiang ïa ka rai jong ka Iingdorbar Thawain ka jylla bad na ka liang jong ka seng ka shim halade ïa ka jingkitkhlieh ban pynbor ïa ka Sorkar Pdeng ban pynrulong ïa ki jingdawa bad halor kane ka seng kan sa pynlong da ka jingïakhih ha Jantar Mantar, Delhi.
U Bah Kharbani u la kyrpad ïa ki paid Khasi bad Garo kiba trei bad kiba pule ha Delhi ban ïasnohkti lang bad ka seng ha ka jingpynlong ïa ka jingïakhih khnang ba ka jingïakhih kam dei shuh hapoh ka Jylla Meghalaya hynrei ha kane ka kynti la pynlong syndon ha tyngkong iing jong ka Sorkar Pdeng ha Delhi.
Dang shen, ki nongïalam ka HANM ki la leit sha Delhi ban aiti ïa ka dorkhas ha ka Presiddent jong ka ri India ka Droupadi Murmu, ha u Myntri Rangbahduh ka ri u Narendra Modi, ha u Myntri ka tnat Kam Pohing u Amit Shah bad kynthup ruh ïa u MP ka Rajya Sabha jong ka BJP u Rakesh Sinha uba peit ïa ka North East.
Nalor kitei ki ar tylli ki mat jingdawa, ka seng ka la pynsngew ruh ha kaba ïadei bad ka jingïapynbeit pud hapdeng ka Jylla Meghalaya bad ka Jylla Assam.
Na ka liang jong u Rakesh Sinha u la ong ba ïa kine ki mat jingdawa yn sa ïakren bad u Myntri Rangbahduh jong ka Ri India ynda la dep ka elekshon sha ka Iingdorbar Thawaiñ jong ka jylla Madhya Pradesh.