Shillong, Risaw, 12: Ka Raid Nongshken ryngkat bad ki ar tylli ki Dorbar Shnong ba kynthup ïa ka Nongshken bad ka shnong Mawdang ki la pynrem jur ïa ka jingïaid lait jong ka kong Sahitina Ïawim halor ka jingjia ba dang shen halor ka jingkynnoh ba ka la shah jrong kti ha ki briew ba la buiad khawiang khlem da pyntip shwa sha ki bor synshar shnong hashwa ban leit ujor sha ki Pulit.
Ha jingïakren bad ki lad pathai khubor, u Rangbah Shnong jong ka shnong Nongshken u Bah Thombor Marbaniang u la pynpaw ba ka jingjia kaba la jia ha ka 8 tarik mynta u bnai Risaw halor ka jingkynnoh shah jrongkti jong kawei ka longkmie kam shym la dei kaba la jia ha u pud u sam jong ka shnong Nongshken.
U Bah D Dura uba dei u Rangbah Shnong jong ka shnong Mawdang kaba dei ruh ka shnong kaba la jia ka jingkynnoh ïashoh ïadat bad shah jrongkti jong ka longkmie u la pynpaw ïa ka jingsngewdiaw halor kane ka jingjia bad pynrem jur ruh ïa ka longkmie kaba la ïaid lait na ka shnong khlem da pyntip halor katei ka jingjia, hynrei ka la leit ujor pynban sha ki bor Pulit.
U Sordar ka Raid Nongshken u Bah Sukher Nongrum u la pynpaw ba ki Rangbah Shnong ki dei kiba peit ïa ka shongsuk shongsaiñ hapoh ki shnong ki thaw haba jia kino kino ki jingklumar hapoh ka shnong ka thaw, hynrei ka jingïaid lait jong ka Kong Sahitina na ki bor shnong ka dei kaba ym lah ban pdiang bad na ka liang jong ki bor synshar shnong kim don jingtip eiei, tad haduh ban da ïoh jingtip napoh Police Station halor katei ka jingjia.
