EJHDFA 3rd Division: Jop ka Umrasiang Utd bad Nongsning Youth

Khliehriat, Nailur 27: Ka Wapungskur SSWO ka la pynthikna ïalade ban jam sha ka wat ïakhun Pre-Quarter final lane ka Round-16 ha ka phutbol kyrdan Third Division jong ka East Jaiñtia Hills District Football Association hadien ba ka la khur jingjop ha ka jingïalehkai ba la long ha ka Sngi Thohdieng (27 tarik Nailur, 2024) ha madan EJDSA Artificial Turf, Diengshynrum, Khliehriat.
Kiwei pat ki kynhun ba khur jingjop ha kane sngi ki kynthup ïa ka Umrasiang Utd SC bad Nongsning Youth SSC.
Haba phai sha ka jingïakhun ba nyngkong ka kynhun ïalehkai jong ka Umrasiang Utd SC ka la pynjemkhnap da 3-0 kol ïa ka Pynurkba Christian SC. Ha kane ka jingïalehkai u Unsaai biang Dkhar u la ïoh ban pynkhihjar ar kol, kawei tang mar ïa sdang 4 minit nangta kaba ar ha ka minit ba 19, katba u Nishwa Muksor u la thep ïa ka kol kaba lai ha 68 minit jong ka kylla miet.
Ha ka jingïakhun kaba ar, la sakhi ïa ka Wapungskur SSWO kaba la wanphai nadien ban pynliem ïa ka Dkhiah East SC da 2-1 kol bad ruh ban pynthikna rung sha ka wat ïakhun Round-16 ha kane ka lympung.
Ha kane ka jingïalehkai, dei ka Dkhiah East SC kaba la ïoh lamkhmat nyngkong lyngba ka kol na u Wan-o- Nongtdu haka minit ba 24 hynrei u Pynshemi Siangshai (34 minit) u la jubab da kaba pynïakhaid na bynta ka Wapungskur SSWO shuwa ba u Miesly Ryngkhlem un thep ïa ka kol pynjop ha ka 61 minit.
Katba ha ka jingïakhun kaba lai la sakhi ïa ka Nongsning Youth SSC kaba la pynliem salit da tang 1-0 kol ïa ka Iapmala Wahshnong SC. ïa kane ka namtam na bynta ka Nongsning Youth SSC la thep da u Knermiki Siangshai haka minit ba 75.