Duna ka jingpynshai ka Sorkar halor ka kam thied jaka ban seng kam karkhana, ong ka HITO

Shillong, Nohprah 15: Ka Hynñiewtrep Integrated Territorial Organization (HITO) ha ka shithi ba la phah sha u Myntri Rangbah ka jylla u Conrad Sangma ka la pynpaw ïa ka jingpyrshah kaba jur halor ka jingduna ki jingpynshai na ka liang ka sorkar ha kaba ïadei bad ka jingtyrwa ban shah ban die jaka sha ki bym dei ki Khasi ban wan ban pynlut ne theh pisa ban sengkam ha kane ka jylla.
Ka seng ka la ong ba ka la pynlong ïa ka ban thoh ïa kane ka shithi la long ban pynpaw ïa ka sur jong ka jingsngewkhia bad ka jingsngewbynniaw ha kaba ïadei bad ki jingmih kaba ka sorkar MDA-2 kaba la ïalam da ka NPP ka la sdang ban pynkylla ïa ka MSIPF Act 2024. Kane ka jingtyrwa ban pynkylla ka pynkupbor ïa ki riew shimet, ki kynhun, bad ki karkhana ban shim jaka ha Meghalaya lyngba ka Investment Meghalaya Association, ha kaba kane kadei ka jingleh kaba ka seng ka ngeit skhem ba kan ïuhroit ïa ki jingkordor ïa ki kam jong ki longshwa manshwa bad kaba don ka jingma ïa ki hok ba da ka aiñ ïa ki trai ri trai muluk ka jylla.
“Ka jingbym burom jong ka sorkar jong phi ïa ka Land Transfer Act of 1971, kaba la khang ïa ki bar jylla ban thied jaka hapoh u pud u sam jong ka jylla jong ngi, bad kane ka la pymih ïa kiba bun ki jingkylli haba ïadei bad ki rukom treikam jong ka sorkar ba haduh katno ka pynneh ïa ki hok bad ki custom jong ka jaitbynriew Khasi,” ong ka kyrwoh ba la phah da u Bah Donbok Dkhar bad u Bah Gary S Myrboh kiba dei u President bad Political Secretary ka HITO.
Ka HITO ka la ong ba katkum ka khana pateng jong ka jaitbynriew Hynñiewtrep naduh mynshwa haduh mynta ka la ïeng beit ban pyrshah ïa kano kano ka jingpyrshang ban knieh ïa ka khyndew ka shyiap jong ki longshwa manshwa bad ban shah ïa kino kino ki mynder ban wan kyntur pud. “Ngi donkam ban phai dien ïa ki jingïakhih ha ki snem 1978, 1987, bad 1996, ha kaba ki briew jong ngi ki la ïeng tylli ban pyrshah ïa ka jingwan ki briew kiba nabar bad ki la ïeng tylli ban ïada ïa ki hok jong ngi. Haba sngewthuh ïa ka jingjur ka jingkyrduh kam jong ki samla jong ngi, ka donkam ruh ban phai sha ki jingleh jong ki karkhana kaba lah ban mih na kane ka jingpynlut da jingwan sengkam jong ki. Kine ki kam khaïi manla ka por ki la ieh shadien ïa ka jinghiar pateng kaba wanrah ka jingeh ïa ka imlang sahlang bad kumjuh ruh ka jingpynjot ïa ka sawdong sawkun kaba la ktah bha ïa ka jaitbynriew jong ngi,” ong kitei ki nongïalam.
“Watla phi lah ban ong ba kine ki jingwan pynlut ban seng ïa ki karkhana kan sa pynmih ïa ki kam ki jam ne ki lad aikam aijam ïa ki samla jong ngi, hynrei ki jingshisha pat ki ïathuh ïa kiwei pat ki khana kiba ïapher. Wat hapdeng ka jingdon ki karkhana pynmih dewbilat bad kiwei pat ki projek karkhana, ka jingbym ïohkam ïohjam ka la nang ïaibteng ha ka jylla jong ngi, ha kaba bun na ki kam la thung ïa ki riew shimet napoh ka jylla Assam bad ki nong Bangladesh ha ka jaka ban aikam ïa ki samla bad nongshong shnong ba bun jong ngi. Kumta kano kano ka jingkren haba ïadei bad ka jingpynmih kam ka paw ba kam don kata ka jingshisha. Ka paw ba ka sorkar jong phi ka hap ïakhun ha kaba ïadei bad ka jingduna ka pla tyngka bad dei halor kane phi la pyrkhat ban shu aiti ïa ka khyndew ka shyiap jong ki longshwa bad kiba la hiar pateng tang ban pyllait ïa ka jingduna pisa. Ngi dei ban long kiba peitngor pyrshah ïa ka jingïakren bad ki kam kiba long ka jingma ïa lynti jong ka jingim ka jong ngi,” ong ka HITO.
Shuh shuh ka seng ka la pynpaw ba ka kwah ban pynkynmaw ïa u Myntri Rangbah halor ki kam ki bym pat lah ban pynbeit kaba dei bad ka Instrument of Accession and the Standstill Agreement, kaba batai shai halor ki por bad ki jinglong jingman haba ïadei bad ki hok ka khyndew ka shyiap kumba la thoh da ki 25 tylli ki ri Hynñiewtrep bad Hima.
“Ka long kaba donkam ban ithuh ïa ki Khasi State da kaba pyrkhat bha ki khlem soi ïa ka Instrument of Merger. Kane ka khana pateng. Kane ka khana pateng ka la dei ban pynkhlaiñ ïa ka jingkular bad ka jingdonkam jong ka sorkar jong phi ban ïada ïa ki hok kumba la bynshet da ki nongshong shnong hadien ba ki la jied ha ka sngi thep vote. Ki paidbah ki la ai ka jingshaniah ha ka sorkar jong phi ym tang ban ïada ïa ka kolshor jong ngi bad ka jinghiar pateng jong ka mei mariang, hynrei ban pynthikna ba kane kam dei ka jingaiti tang namar ka jingïoh jingmyntoi ha ka liang ka pisa ne ka tyngka. Ngi da kyrpad jur ïa phi ban pyrkhat ïa kine ki kam ba la shah ïalam bakla. Kumta ngi kyrpad ïa ka jingpynshai halor ka MSIPF Act 2024 bad ban kyrpad ïa phi ba pynneh ïa ki jingaiti jong phi ha kaba ïadei bad ki jingbishar ba hok, ka jinglong khuid bad ban burom ïa ki hok jong ki trai ri trai muluk jong ki nongshong shnong ka jylla Meghalaya,” pynkut ka HITO ha ka shithi ba la phah sha u Myntri Rangbah ka jylla.