Rung tuh 7 ngut ki Bangladeshi sha India, kurup ïa ki mar khaïi tuh ba shongdor T.9.83 lak

Nongstoiñ, Nohprah, 15: Hynñiew ngut ki mynder na ka ri Bangladesh kiba wan rung tuh shapoh u pud u sam jong ka ri India ki la shah kem ha ki shipai BSF ha khappud jong ka India-Bangladesh ha ka sngi Thohdieng jong ka taiew ba ladep.
Ïa kine ki hynñiew ngut ki mynder ri la ïohbat da ki BSF jong ka 172 Battalion na khappud jong ka ri India-Bangladesh katba ki dang wan rung shapoh ka Jylla Meghalaya lyngba ka Ratacherra kaba hap hapoh ka East Jaiñtia Hills District.
Ha ka jingtohkit, la lap ba kine ki mynder ki la shah pynngop ha ki arngut ki mynder Bangladeshi kiba la pynrung tuh ïa ki da kaba siew 7000 hajar taka da ka pisa Bangladesh, kata, mar 1000 hajar taka shi khieh briew da kaba kular ba pynïoh jingsumar ei ha Kolkata na ka bynta ki arngut ki briew, kata u Mohammed Shahjahan, 55 snem bad ïa ka samla Aarifa 20 snem kiba sah ha Tootpalt, Khulna, Thesil District, Bangladesh.
Kine ki hynñiew ngut ki la thmu ban leit sha Kolkata da kaba wan lyngba ka shnong surok Dona Skur na ka surok NH 6 bad ban bteng ïa ka jingleit sha Badarpur Railway Station, Assam bad hadien kata ban leit pat sa sha Kolkata.
Ïa kine ki hynñiew ngut ki mynder la aiti noh sha ki shipai Border Guard of Bangladesh (BGB) lyngba ka Flag Meeting ha ka sngi Saitjaiñ.
Ha kawei pat ka jingjia, ki shipai BSF ki la ïoh ban pynpulom ïa ki snar nongkhaïi tuh katba ki dang thmu ban shalan tuh ïa ki mar lyngba ka khappud Indo-Bangladesh na ka shnong Sonata, Dawki bad Kasinda kiba hap hapoh ka East Khasi Hills District.
Ki shipai ki la ïoh kurup ïa ki mar khaïi tuh kiba shongdor T. 9.83 lak, ba kynthup ïa ki masi, ka shini, kiad, ki jaiñ, ki tiar trok, ki biskit, dohkha, kwai, phan, ki nep syaid, rynsun bad kiwei kiwei ki marbam. Ïa kine ki mar khaïi tuh la aiti noh sha ka ophis Customs ban leh ïa kaba donkam katkum ki kyndon jong ka aiñ.
Ka kynhun shipai pahara khappud ka la bteng ïa ka thong ban ïada ïa ka khappud jong ka ri India na ka bynta ban ïakhun pyrshah ïa ki kam be-aiñ bad ki kam runar ruser ha khappud, kynthup ïa ka jingwan rung tuh bad ka jingkhaïi tuh.