Shillong, Risaw 05: Ka sorkar jylla ka la duh ei ïa ka khajna kaba kot haduh kumba Rs 57.83 klur tyngka namar ka jingbym lah ka tnat execise ban pynmih(notify) ïa ki kyndon ba hap ban bud ha ka jingpynmih ïa ka kyiad Indian Made Foreign Liquor (IMFL) na ki Extra Neutral Alcohol (ENA).
Katkum ka kaiphot halor ka jingïoh khajna jong u snem mamng tyngka ba kut ha ka 31 tarik Lber 2020 na ka Comptroller and Auditor General of India (CAG) la kdew ba ka sorkar jylla kam pat don kano kano ka jingpynkhreh ïa ki jnit ki jnat jong ka kyndon kaba ka la shna na bynta ban pynmih ïa ki kyiad IMFL bad ENA.
“Na ka daw ka jingbym lah ka sorkar jylla ban pynmih(notify) ïa ki kyndon ba hap ban bud ha ka jingpynmih ïa ka kyiad Indian Made Foreign Liquor (IMFL) na ki Extra Neutral Alcohol (ENA) wat hadie ba la dep ban kdew ïa ki jingduna jong ka ha ka kaiphot jong u snem mamng tyngka ba kut ha ka 31 tarik Lber 2014 kaba la wanlam ïa ka jingduhnong kaba kot haduh 57.83 klur, 30.69 ha ka dur ka eexcise duty bad 27.13 klur ha ka dur ka ka VAT na ka jingpynmih kyiad ba 3,78,946.00 cases ha ki san snem ba ngi shim jingkheiñ” bad bynrap “Na kane ka jingbym lah ban ban pynmih(notify) ïa ki kyndon ba hap ban bud ha ka jingpynmih ïa ka kyiad Indian Made Foreign Liquor (IMFL) bad ka Extra Neutral Alcohol (ENA) bad ki kyndon ha ka por ba shna ïa ka ENA na ki kynja khaw ka la wanlam ïa ka jingduh ka khajna kaba haduh
Rs 57.83 klur,” ong ka kaiphot ka CAG.
La ong ruh ba ka lah ban don ruh ka jingai jingkheiñ duna ïa ka jingpynmih bad ka jingdie ïa ki IMFL.
Ïa kane ka kam la ai jingtip sha ka sorkar ha u Naiwieng 2021. Ha ka jingïalang kaba long ha u Rymphang mynta u snem u Commissioner & Secretary in-charge Excise department u la ong ba na ka liang ka tnat kan sa pynmih ïa ki kyndon na bynta ban pynmih ïa ki kyiad IMFL na ki ENA la kumno kumno ha u bnai Jymmaang mynta u snem.
Ha u 2014 ka jingduh ei ka khajna ha ka dur ka excise duty bad ka VAT na ka daw ka jingbym don kiba kine ki kyndon ka kot kumba 10.15 klur.
Ha ka jylla ka don kawei ka distillery plant, kawei ka brewery plant bad san tylli ki bottling plant. Ka jingdon pat ki warehouses ka long 40 tylli kiba lah ban thied ïa ka kyiad ba la pynmih na kine ki jaka shna ban pynpoi pat sha ki nongdie kyiad ha kylleng ka jylla ban die sha ki nongdih.
Ka kaiphot haba ïadei bad ka distillery plant bad san tylli ki bottling plant naduh u 2016-16 haduh u 2019-20 kaba bud dien la ka jinglum khajna ka long kaba dei, kat kum kane ka kaiphot la lap ba nadeng san tylli kine ki bottling plant ha ka jylla saw tylli na ki ki pyndonkam kumba 3,58,34,527.60 BL ka ENA hapdeng u snem 2015-16 haduh 2019-20.
Hadien ba la kheiñ la diah ïa 1% wastage norms (0.5% na bynta ka blending bad 0.5% ka racking), la antad ba kine ki bottling plant kin pynmih kumba 90,96,457.00 cases ka IMFL.
Hynrei kine ki saw tylli ki bottling plant ki kam ba ki pynmih tang kumba 87,17,511 cases ka IMFL bad kane ka kdew ba ka don ka jingduna ka jingpynmih jin haduh 3,78,946.00 cases.
Ka kaiphot ka la ong ruh ba kine ki bottling plant kim shym la pynbiang satia ïa ka jingkheiñ jingdiah halor ka jingthied bad pyndonkam ïa ka ENA bad kim ai jingkheiñ ruh ïa kane sha ka tnat excise.
Ka kaiphot ka la ong ba ka dor jong ka khajna ha ka dur ka excise duty kaba dei ban siew kat kum ka hukum ka sorkar ka dei ban long 810 tyngka na man ka shi case katba ka khajna ha ka dur ka VAT ba la buh dor da ka Taxation Dept ka long 40% bad ka jingïoh khajna kan pher na kiwei ki jait kyiad sha kiwei pat hynrei ka dor ka jingïoh khajna kan long hapdeng ka 716.00 tyngka haduh 787.59 na man ka shi case.
