Nongpoh, Nailar 06: Bun tylli ki Kali paidbah ki la sahkut ha shiteng lynti hynnin ka janmiet Lah Sngi U Blei hadien ba ki la leit ban theh umphniang Bharat Petroleum kaba don harud surokbah National Higway-6 ha ki bynta jong ka shnong Umran Dairy.
Ki Kali kiba la leit theh petrol na kane ka Petrol Pump tang hadien ba ki la ïaid katto katne ka jingjngai ki la sahkut noh ha surok namarba ka kali kam ïaid shuh hynrei dei hadien ba la khot ïa ki nongshna ba la lap ba ka Petrol kaba ki leit theh na katei ka petrol pump ka la long kum ka um jngut.
Baroh ki kali kiba la shah ktah na ka jingleit theh petrol na Bharat Petroleum hadien ba la lap ïa ka jingshisha ki la ïalum ha katei ka petrol pump ban kylli bad pyrthew bad tang hadien khyndiat por la wan poi ruh ki Pulit na Umsning Police Outpost.
Haba wad ïa ka daw, ki la paw ba ka petrol pump ka dang maramot ïa ka Tanky umphniang bad na ka daw ka jingjur slap ka um slap ka la rung sha ka Tanky kaba la pynlong ïa kiwei ki kali ban mad ïa ka apot ban shah ktah ka kali haduh ba kim lah shuh ban ïaid ba ki la sniew hadien ba la leit thep umphniang na katei ka petrol pump.
Ha kane ka jingïalum ha katei ka petrol pump, ki trai kali ba la shah ktah ki la dawa ban siew bailutksan ïa ka jingshna ïa ki kali bad ki la ïa soi ruh da ka soskular ba ka Petrol Pump kan pynlut ïa ka jingshna ïa kitei ki kali ba la ngat ha katei ka apot.
