Watla mang T. 11 klur dangsah kumjuh ka Ïewduh

Shillong, Nailar 06: Kumba ka long mynta na ka bynta ban pynbha ban pynwandur ïa ka Ïewduh, ka sorkar jylla ka la dep ban aiti ïa ki work order sha ki kontraktor kiba la phiah bad bynta ïa ki kam ban pyntrei ha sawdong ki jaka ha Ïewduh.
Lah ban ong ba ka jingshna ban pynitynnad ïa ka Ïewduh, shen yn sdang noh ban pyntrei ïa ki kam kynthup naduh ki lynti ïaid kjat, ki nala, bad kiwei de ki jingdonkam ban pynbha.
Ha kaba ïadei bad kane katkum ka khubor ba la ïohlum la ïathuh bad la ïoh jingtip ba ka jingpyntreikam ïa ka Ïewduh yn ïaid katkum ka Phase bad ka jingpyntrei kan long shwa ha kito ki jaka kiba kham lait na ka jingwit na ki briew namar ba ym lah ban khang ïa ka ïew kaba long man ka sngi.
Lah ban pynkymaw ba ka North Eastern Council (NEC) ka la mang T.11 klur ban pynwan dur ïa ki jingdonkam ha Ïewduh naduh ki lynti ïaid, ki nala bad ki pipe um bad kiwei ki jingdonkam.
Lah ruh ban ong ba ka Hima Mylliem dang shen ka la kynduh ïa ki kontraktor ban batai ïa ki jaka ba ki ïoh ban pyntrei kumba la bynta bad phiah ka sorkar.
Na bynta kiwei ki briew kiba wan nabar jylla, bad nabar ri, ka Ïewduh ka dei ruh ka jaka jngohkai kaba kyrpang ban ïohi ïa ka lariti bad ka kolshor jong ki Khasi ha kane ka jylla.
Ka Ïewduh ki don kumba saw hajar tam eiei ki dukan bad katba nang mih ki sngi ka la nang khapngiah na ka jingshna bun ki dukan bad ki nongdie madan.
Kumba ka long haduh mynta, ka la buh ruh ïa ka jingkylli ba haduh lano tharai lah ban ïoh ïa ka jingpynbha briew ïa ka Ïewduh kan urlong wat hadien ba ka NEC ka la mang T. 11 klur bad kumba ka long mynta ka Ïewduh ka neh bad ka sah kumba ka long bad ki jingphohsniew ban pynbha briew ïa ka, ka dang sah haduh mynta mynne.