Hadien ka jingpynap kaba la slem ban aiti noh sha ki Private Company ïa ka Karkhana dewbilat Mawmluh Cherra Cements Ltd (MCCL) Mawmluh, Sohra, u Chairman jong ka MCCL, u Bah Wailadmi Shylla, u la pynbna ba ka sorkar ka thmu ban iateh ne ban aiti ha ka Bhavika Commercial Private Limited (BCPL), kaba dei ka Kompeni na Kolkata. Ha ka jingshisha kane ka jingaiti sha kane ka Kompeni kam da dei eh kaba la pdiang sngewbha tylli tyllan da ka thaiñ Sohra baroh kawei, namar ba ki don kibym sngewïahap ban aiti ïa ka Public Sector Unit sha ki Private Company. Ñiuma, haba ïohi ïa ka jingleh meinah ka sorkar jylla khamtam ka sorkar MDA ïa kane ka Karkhana dewbilat ba nyngkong eh ha jylla, ka la wanrah khyndiat ka jingkyrmen ba kane karkhana kan khie im biang sa shisien.
Pynban ka jingthoh ba la pynmih da i Kong Patricia Mukhim, Columnist ha ka 24 tarik u Risaw 2022, ka wanrah shibun kiei kiei kiba ki paidbah ki hap ban ïapyrkhat. Ka daw ka long ba kane ka Kompeni na Kolkata kumba la thoh da ine i longkmie kadei Kompeni kaba dang mih dang ha u snem 2011 bad ka jingpynmih dewbilat jong ka ruh ka dang long tang kumba 1.2 lak ton shisnem.
I Kong Patricia i la ong ruh ba ki nongtrei ka MCCL ki kheiñ ïalade ba ki dei ki nongtrei sorkar. Hynrei haba trei ha kano kano ka kompeni hap pynïaid katkum ki kyndon kiba la buh da ka kompeni bad kita ki kyndon ki long kiba pyrkhing. Ym lah ban shim shuti katba mon lane ban wan trei slem bad leit phai sha ïing dang kloi. Bunsien hi ki briew jongngi kim sngewthuh ïa kane ka kolshor trei kam jong ki kompeni bad ki sngew ba ki lah ban leh mon kumba leh ki nongtrei sorkar. Dei na kane ka daw ba ki kompeni ba pynïaid ka sorkar baroh ki pheil lut, naduh la MeECL haduh ka MCCL. Shu kit tang ka ram shi rynjaiñ!.
Hynrei mynta haba ka sorkar ka la rai ban wanrah da ka kompeni nabar ban ïatrei lang bad ka ha kata kaba la khot ka joint venture ha kaba ka sorkar ka don ka bhah jong ka ha ka MCCL kiba long ki kor tylliat mawshun bad ki kor pynkylla dewbilat ïa u mawshun. Na ka liang ka BCPL la khmih lynti ba kan wanrah ïa ka pisa bai seng (investment) bad ba kan pyntrei kam biang sa shisien ïa ka MCCL. Dei namar kata ka daw ba donkam ban wanrah da ka kompeni kaba don ïa ka nam bad ka histori trei kam kaba lah ban shaniah. Hynrei kumba ju jia ha kane ka jylla jongngi bunsien hi ym ju leh ïa kiei kiei baroh ha kaba shai. Ka don beit ka jingbyrngut bad ka jingbymshai ha kano kano ruh ka kam kaba ïadei bad ki kontrak kiba ïatrei bad ki kompeni kiba nabar.
Lada ka long kumne, ka buh ïa kane ka Karkhana ha ka lawei kaba dum bad kaba ym don jingkyrmen, namar kumne ka Kompeni kaba dang shu mih dang ha u snem 2011, kata dang 11 snem mynshuwa kan shimti ban pynïaid ïa ka jingtreikam ka Karkhana kaba la mih naduh ki phew snem mynshuwa. Ka long kaba sngewlyngngoh ruh ba kumno kat ka jingdon ki Kompeni hangne khamtam ka Lafarge Cement kaba la tbit bha ha ka kam pynmih dewbilat, ka sorkar kam shym la peit ban aiti.
Ha ka karkhakhana kum ka MCCL donkam ban aiti ha ki Kompeni kiba la don ka jingtbit bad ka experience kaba biang bha, namar ba kadei ka karkhana kaba la rim bad kaba ki kor ki bor bad ka system kaba pyndonkam ha kaba pynmih dewbilat ruh kadei kaba la rim.
Kumta ka long kaba donkam ban peitngor, khamtam ki paidbah jong ka Mawmluh, Sohra ha shuwa ba ka sorkar kan aiti khatduh ne kan ïasoi ïa ka Memorandum of Understanding bad kane ka Kompeni. Hap ban peit bad wad bniah ïa kane ka Kompeni, ïoh shu dei ka Kompeni kaba malu mala baxd ka bym kotbor ban leh ïa ka kam.
