Jowai, Risaw 17 : Ki samla pule jong ka Jowai Polytechnic hapoh ka shatri jong ka Jowai Polytechnic Student Association mynta ka sngi 16 tarik u Risaw 2025, hapoh ka jingïalam u samla Wankit Kupar Nongrum, General Secretary jong ka Association, ryngkat kiwei pat ki nongkitkam, kila leit ban ïa kynduh bad ai ruh da ka jingthoh sha u Myntri ba peit ïa ka tnad Sports & Youth Affairs jong ka Sorkar Meghalaya, u ma Wailadmiki Shylla.
Kane ka jingïakynduh ka long na ka bynta ban kyrpad ïa ka sorkar ba kan pynbha shuh shuh ïa ka Jowai Polytechnic, khamtam eh ban ïoh madan lehkai kum ka madan Football, Basketball bad ruh ka madan Volleyball na ka bynta ki samla pule jong ka Institute.
Haka jingïakynduh bad u myntri kitei ki samla pule ki la pynpaw ïa ka jingsngew ba la jan 25 snem kynthih jong ka Institute, haduh mynta kim pat ïoh satia tang kawei ruh ka madan ba biang na ka bynta ki jingïalehkai, katba ha ka juh ka por ka sorkar ka ju kular ban kyrshan bad pynshlur ïa ki samla ba kin shim bynta ha ki kam ïalehkai.
Dei namar kane, ki samla pule jong ka Jowai Polytechnic ki ju hap ban wad madan na kiwei pat ki jaka, lane na kiwei ki skul bad ki Association ban pyndep ïa ki kam ïalehkai.
Na ka liang u myntri ma Wailadmiki Shylla, uba dei ruh u MLA jong ka Constituency kaba kynthup ruh ïa ka Jowai Polytechnic, u la pynpaw ba un shimkhia ban ïarap ïa ki samla pule bad ïa ka skul hi baroh kawei. Ula ong ruh ba ym lah ban ai noh lut baroh ha kawei ka sien, hynrei un pyrshang katba lah ban wanrah ïa ka jingmyntoi kaba shisha na bynta ki samla pule jong kane ka jaka pule. Ula kular ruh ba un peit bniah ïa ka mang tyngka jong ka tnad kaba u peit, khnang ba un lah ban ai jingkyrshan kaba biang.
U Myntri ula pyntip ruh ba un wan hi da lade ban ïa kynduh bad ki samla pule na ka bynta ban sngap ïa ki jingeh jong ki bad ban ïakren shai halor kaei kaba donkam ban pynbha shuh shuh ïa kane ka jaka pule kaba dei tang kawei kaba don hapoh ka Ri-Lum Jaiñtia.
