Shillong, Nohprah 18 : Ka Hynniewtrep Youth Council (HYC), lyngba u President jong ka, Bah Roykupar Synrem ha ka sngi Nyngkong u la ong ba ka long kaba donkam haduh katta ban wanrah noh da ka polisi ban peit kyrpang na ka bynta kiba bun ki jingeh kiba ïadei bad ki nonghikai ha ka jylla.
Haba kren ha ka jingïalang ban kynmaw burom ïa ka lyngkhuh sngi ïap ba 83 jong u Myllung Soso Tham, u Bah Roykupar u la ong ruh ba utei u Myllung um dei shuh tang u Myllung ba khraw hynrei u la dei ruh u nonghikai uba shemphang haduh katta katta.
Kumta, u la kyntu ruh ïa ka sorkar jylla ba kan wanrah da ki lad ki lynti kyrpang na ka bynta ka bha ka miat jong ki nonghikai ha ka jylla khnang ba kin lah ban ïoh ïa ka jingim kaba kham bit kham biang hadien ba ki la shongthait.
Katkum ka jingong jong u, u la ong ba ka long kaba sngewsih haduh katta katta ban ïohi ba ki don ki nonghikai kiba la shakri lyngba ka kam hikai na ka bynta 30 snem hynrei don na ki pat ki bym ïoh ïa ka baibam tymmen lane ka penshon.
“Watla ki la aiti lut ïa ka jingim la palat 30 snem ha ka kam hikai hynrei kitei ki nonghikai ki la shah knieh noh ïa ka hok ban ïoh ïa ka baibam tymmen kaba la wanrah ïa u dak jingkylli uba heh kumno kin leh hadien ba ki la shongthait,” la bynrap shuh shuh u Bah Roykupar Synrem.
Haba kren pat halor ka rai jong ka sorkar ban pdiang noh da ki kot NCERT ha ki skul, u President ka HYC u la buh jingkylli halor ka jingleh kyrkieh ban pyntreikam ïa katei ka rai khlem da peit thuh shwa la kane kan don jingktah neem ïa ki samla pule.
Katkum ka jingong jong u, u la ong ba ka sorkar jylla ha ka jingshisha ka la dei ban pynlong ka jingwad bniah ha shwa ban pyntreikam ïa kitei ki kot jong ka NCERT.
“Kitei ki kot kim dei ruh ban ïaid lait ïa ka histori lane ka khana pateng bad ka jingnoh synñiang jong ki paid ka Meghalaya kumta, ka sorkar jylla kadei ban pynlong ka jingpeit bniah ha shwa ba kan pyntreikam ïa kitei ki kot NCERT.”
Hadien ba la dep ban buh syntiew ha u mot jong u Soso Tham, ka HYC ka la pynkup burom ruh ïa ki nongjop ha ki lympung ïakob bapher bapherkynthup ha ka jingïatai lyngkot bad ruh ka jingïakob thoh essay ba la pynlong da ka Socio Cultural Cell jong ka Council.
